(ସତ୍ୟପାଠ ବ୍ୟୁରୋ) ଭୁବନେଶ୍ଵର : ପଶ୍ଚିମବଙ୍ଗରେ ନିର୍ବାଚନ ପରବର୍ତ୍ତୀ ହିଂସାକୁ ନେଇ ରାଜ୍ୟପାଳ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ଦୋଷ ଲୋଦୁଛନ୍ତି। ଏବେ ରାଜ୍ୟପାଳ ଜଗଦୀପ ଧନଖଡଙ୍କୁ ଚିଠି ଲେଖି ଏହାର କଡା ଜବାବ ଦେଇଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ। ହିଂସା ପ୍ରଭାବିତ କୁଚ୍ଛ ବିହାର ଜିଲ୍ଲାକୁ ରାଜ୍ୟପାଳଙ୍କ ପୂର୍ବ ନିର୍ଦ୍ଧାରିତ ଗସ୍ତର ଗୋଟିଏ ଦିନ ପୂର୍ବରୁ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କୁ ଏକ ଚିଠି ଲେଖିଛନ୍ତି। ଯେଉଁଥିରେ ସେ କହିଛନ୍ତି ଯେ ରାଜ୍ୟପାଳଙ୍କ ଗସ୍ତ ଦୀର୍ଘ ଦିନର ପ୍ରୋଟୋକଲକୁ ଉଲ୍ଲଂଘନ କରୁଛି। ବାନାର୍ଜୀ ତାଙ୍କ ଚିଠିରେ କହିଛନ୍ତି ଯେ ମୁଁ ସୋସିଆଲ ମିଡିଆରୁ ଜାଣିବାକୁ ପାଇଛି ଯେ ଆପଣ ମେ 13 ରେ କୁଚ୍ଛ ବିହାର ଜିଲ୍ଲାକୁ ଯାଉଛନ୍ତି ଏବଂ ଦୁଃଖର ବିଷୟ ଯେ ଏହା ବହୁ ଦଶନ୍ଧି ଧରି ରହିଆସିଥିବା ନିୟମର ଉଲ୍ଲଂଘନ । ସେ ଆହୁରି ମଧ୍ୟ କହିଛନ୍ତି ଯେ, “ତେଣୁ ମୁଁ ଆଶା କରିବି ଯେ ଆପଣ ଦୟାକରି ପ୍ରୋଟୋକଲ୍ ନିୟମକୁ ଅନୁସରଣ କରିବେ ଏବଂ ଏହି ଆକସ୍ମିକ ଗସ୍ତ ନିଷ୍ପତ୍ତିରୁ ନିବୃତ୍ତ ହେବେ।” ମଙ୍ଗଳବାର ରାଜ୍ୟପାଳ ଜଗଦୀପ ଧନଖଡ କହିଥିଲେ ଯେ ସେ ମେ 13 ରେ କୁଚ୍ଛ ବିହାର ଜିଲ୍ଲାରେ ହୋଇଥିବା ନିର୍ବାଚନ ପରବର୍ତ୍ତୀ ହିଂସା ଦ୍ୱାରା ପ୍ରଭାବିତ ଅଞ୍ଚଳ ପରିଦର୍ଶନ କରିବେ । ବାନାର୍ଜୀ ଗତ ବର୍ଷ ସେପ୍ଟେମ୍ବର 26 ରେ ଧନଖଡଙ୍କୁ ଲେଖିଥିବା ଏକ ଚିଠିର ଉଦାହରଣ ଦେଇ ଉଲ୍ଲେଖ କରିଛନ୍ତି ଯେ, “ତୁମ (ରାଜ୍ୟପାଳ) ଅଧୀନରେ ଥିବା କ୍ଷମତାକୁ ଅତିକ୍ରମ କରି , ମୁଖ୍ୟମନ୍ତ୍ରୀ ଏବଂ ତାଙ୍କ ମନ୍ତ୍ରୀ ପରିଷଦକୁ ନିର୍ଦ୍ଦେଶ ଦେବା ଏବଂ ରାଜ୍ୟର ଅଧିକାରୀଙ୍କ ସହିତ ଯୋଗାଯୋଗ କରିବା ଏବଂ ସେମାନଙ୍କୁ ଆପଣଙ୍କ ସମ୍ମୁଖରେ ହାଜର ହେବାକୁ ନିର୍ଦ୍ଦେଶ ଦେବା ସମ୍ବିଧାନର ଉଲଙ୍ଘନ। ” ସିଏମ୍ ଅଭିଯୋଗ କରିଛନ୍ତି ଯେ ରାଜ୍ୟପାଳ ଏହି ପରାମର୍ଶକୁ କ୍ରମାଗତ ଭାବରେ ଅଣଦେଖା କରୁଛନ୍ତି। ପଶ୍ଚିମବଙ୍ଗରେ ମତଦାନ ପରେ ହୋଇଥିବା ହିଂସାରେ ମୁଖ୍ୟତଃ ଭାରତୀୟ ଜନତା ପାର୍ଟି (ବିଜେପି) ଏବଂ ଟିଏମସିର ଅତି କମରେ 16 ଜଣ କର୍ମୀଙ୍କ ମୃତ୍ୟୁ ହୋଇଛି। ମେ ୨ ରେ ବିଧାନସଭା ନିର୍ବାଚନର ଫଳାଫଳ ଘୋଷଣା ହେବା ପରଠାରୁ ରାଜନୈତିକ ସଂଘର୍ଷରେ ମଧ୍ୟ ଅନେକ ଲୋକ ଆହତ ହୋଇଥିଲେ। ରାଜଭବନର ଏକ ବିବୃତ୍ତିରେ କୁହାଯାଇଛି ଯେ କୁଚ୍ଛ ବିହାର ଜିଲ୍ଲାର ନିର୍ବାଚନ ପରବର୍ତ୍ତୀ ହିଂସା ଦ୍ବାରା ପ୍ରଭାବିତ ଅଞ୍ଚଳ ଗସ୍ତ ପରେ ଧନଖଡ ଆସନ୍ତା 14 ରେ ଆସାମର କ୍ୟାମ୍ପ ପରିଦର୍ଶନ କରିବେ। ଆସାମ ଗସ୍ତ ସମୟରେ ପଶ୍ଚିମବଙ୍ଗର ରାଜ୍ୟପାଳ ରଣପାଗଲି ଏବଂ ଶ୍ରୀରାମପୁର କ୍ୟାମ୍ପକୁ ଯିବେ ବୋଲି ରାଜ ଭବନ ବିବୃତ୍ତିରେ କୁହାଯାଇଛି।
