ଝାଡ଼ଖଣ୍ଡ(ସତ୍ୟପାଠ ବ୍ୟୁରୋ): ଅନ୍ତର୍ଜାତୀୟ ମହିଳା ଦିବସ ଅବସରରେ ଝାଡ଼ଖଣ୍ଡର କଂଗ୍ରେସ ବିଧାୟିକା ଅମ୍ବା ପ୍ରସାଦ ଘୋଡ଼ା ଚଢ଼ି ବିଧାନସଭାରେ ପହିଞ୍ଚିଥିବାର ଦେଖିବାକୁ ମିଳିଛି । ୩୧ ବର୍ଷିୟ ଅମ୍ବା ପ୍ରସାଦ ଝାଡ଼ଖଣ୍ଡର ରାମଗଡ ଜିଲ୍ଲାର ବଡ଼କାଗାନ ବିଧାନସଭା ନିର୍ବାଚନମଣ୍ଡଳୀରୁ ଜଣେ ବିଧାୟିକା ଅଟନ୍ତି। ତେବେ ସାରା ବିଶ୍ୱ ମାର୍ଚ୍ଚ ୮କୁ ବିଶ୍ୱ ମହିଳା ଦିବସ ଭାବରେ ପାଳନ କରୁଥିବା ସମୟରେ କଂଗ୍ରେସ ବିଧାୟିକା ଘୋଡ଼ାରେ ବିଧାନସଭା ପହଞ୍ଚିବା ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି । ସେପଟେ ଏହି ବିଶେଷ ଉତ୍ସବରେ ସେ କହିଛନ୍ତି ଯେ, ପ୍ରତ୍ୟେକ ମହିଳାଙ୍କ ଠାରେ ଦୁର୍ଗା ଏବଂ ଝାନସୀ ରାଣୀ ହେବାର ଦକ୍ଷତା ରହିଛି । ତେଣୁ ସାହସର ସହିତ ପ୍ରତ୍ୟେକ ଚ୍ୟାଲେଞ୍ଜର ସାମ୍ନା କରନ୍ତୁ । ଆମ ସମାଜରେ ମହିଳାମାନଙ୍କୁ ସଶକ୍ତ କରିବା ଏବଂ ଅର୍ଥନୈତିକ, ରାଜନୈତିକ, ସାମାଜିକ ସମେତ ବିଭିନ୍ନ କ୍ଷେତ୍ରରେ ସେମାନଙ୍କର ଅଂଶଗ୍ରହଣ ବୃଦ୍ଧି କରିବା ଏବଂ ସେମାନଙ୍କୁ ଅଧିକାର ବିଷୟରେ ଅବଗତ କରାଇବା ହେଉଛି ଆନ୍ତର୍ଜାତୀୟ ମହିଳା ଦିବସ ପାଳନ କରିବାର ମୂଳ ଉଦ୍ଦେଶ୍ୟ ।
ଚଳିତ ବର୍ଷର ଅନ୍ତର୍ଜାତୀୟ ମହିଳା ଦିବସର ବିଷୟ ବସ୍ତୁ ହେଉଛି ଏକ ସ୍ଥାୟୀ ଆସନ୍ତାକାଲି ପାଇଁ ଆଜି ଲିଙ୍ଗଗତ ସମାନତା ବୋଲି ଗଣମାଧ୍ୟମ ନିକଟରେ କଂଗ୍ରେସ ବିଧାୟିକା କହିଛନ୍ତି । ଅନ୍ୟପଟେ ଅମ୍ବା ପ୍ରସାଦଙ୍କ ପିତାଙ୍କ ନାମ ହେଉଛି ଯୋଗେନ୍ଦ୍ର ସାହୁ ଏବଂ ମାତାଙ୍କ ନାମ ନିର୍ମଳା ଦେବୀ । ସେ ଝାଡ଼ଖଣ୍ଡ ବିଧାନସଭାର ସର୍ବ କନିଷ୍ଠ ବିଧାୟିକା। ସେ ୨୦୦୭ ରେ ନୂଆଦିଲ୍ଲୀର କାର୍ମେଲ ବାଳିକା ବିଦ୍ୟାଳୟରୁ ମାଟ୍ରିକ ପରୀକ୍ଷା ଦେଇଥିଲେ। ଏହା ପରେ, ୨୦୦୯ ମସିହାରେ, ହାଜରିବାଗ ଡିଏଭି ପବ୍ଲିକ ସ୍କୁଲରୁ ଦ୍ୱାଦଶ ପାସ କଲେ । ସେ ୨୦୧୪ ରେ ଜାଭିଅର ଇନଷ୍ଟିଚ୍ୟୁଟ୍ ଅଫ ସୋସିଆଲ ସର୍ଭିସରୁ ପିଜିଡିଏମ କରିଥିଲେ । ତା’ପରେ ସେ ୨୦୧୭ ରେ ହାଜିରାବାଗରୁ ତାଙ୍କର ଏଲଏଲବି ଡିଗ୍ରୀ ହାସଲ କରିଥିଲେ । ସେପଟେ ବାରବାଗା ବିଧାନସଭା ନିର୍ବାଚନରେ ଅମ୍ବାଙ୍କ ପିତା ୨୦୦୯ ନିର୍ବାଚନରେ ଜିତିଥିଲେ।
ଏହି ବିଜୟ ପରେ ତାଙ୍କୁ ରାଜ୍ୟ ମନ୍ତ୍ରୀ କରାଯାଇଥିଲା। କିନ୍ତୁ ସେ ଅନେକ ଗୁରୁତର ଅଭିଯୋଗର ସମ୍ମୁଖୀନ ହୋଇଥିଲେ । ଯାହା ପରେ ତାଙ୍କୁ ଗିରଫ କରାଯାଇ ଜେଲକୁ ପଠାଇ ଦିଆଯାଇଥିଲା। ଅମ୍ବାଙ୍କ ପିତା ଜେଲକୁ ଯିବା ପରେ ତାଙ୍କ ମା ନିର୍ମଳା ଦେବୀ ୨୦୧୪ ରେ ସମାନ ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ। ତାଙ୍କ ମା ନିର୍ବାଚନରେ ଜିତିଥିଲେ କିନ୍ତୁ ୨୦୧୬ ରେ ଗୁଳି ବିନିମୟ ପରେ ପୋଲିସ ତାଙ୍କୁ ଗିରଫ କରିଥିଲା। ଗିରଫ ପରେ ଗ୍ରାମବାସୀ ତାଙ୍କୁ ହେପାଜତରୁ ମୁକ୍ତ କରିଥିଲେ ଏବଂ ପରେ ତାଙ୍କୁ ଗିରଫ କରାଯାଇଥିଲା।