ଭୁବନେଶ୍ୱର (ସତ୍ୟପାଠ ବ୍ୟୁରୋ): ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଗଭର୍ଣ୍ଣର ଶକ୍ତିକାନ୍ତ ଦାସ ଶୁକ୍ରବାର ଦିନ କହିଛନ୍ତି ଯେ ୨୦୦୦ ଟଙ୍କିଆ ନୋଟ୍ ଫେରିବାରେ ଲାଗିଛି ଏବଂ ବର୍ତ୍ତମାନ କେବଳ ୧୦୦୦୦ କୋଟି ଟଙ୍କା ମୂଲ୍ୟର ନୋଟ୍ ଲୋକଙ୍କ ପାଖରେ ଅଛି । ଏହି ନୋଟଗୁଡିକ ମଧ୍ୟ ଫେରସ୍ତ କିମ୍ବା ଜମା କରାଯିବ ବୋଲି ତାଙ୍କର ବିଶ୍ୱାସ ରହିଛି | ଅକ୍ଟୋବର ୬ରେ ଆରବିଆଇ ସୂଚନା ଦେଇଥିଲା ଯେ ପ୍ରାୟ ୧୨,୦୦୦ କୋଟି ଟଙ୍କା ମୂଲ୍ୟର ୨୦୦୦ ଟଙ୍କିଆ ନୋଟ୍ ଏବେ ବି ବଜାରରେ ଅଛି ଏବଂ ଆରବିଆଇକୁ ଫେରସ୍ତ କରାଯାଇ ନାହିଁ।
ଦିଲ୍ଲୀର ଏକ କାର୍ଯ୍ୟକ୍ରମରେ ଭାଷଣ ଦେଇ ଶକ୍ତିକାନ୍ତ କହିଛନ୍ତି, ‘୨୦୦୦ ଟଙ୍କିଆ ନୋଟ୍ ଫେରି ଆସୁଛି ଏବଂ ବର୍ତ୍ତମାନ ବଜାରରେ କେବଳ ୧୦୦୦୦ କୋଟି ଟଙ୍କା ନୋଟ୍ ବାକି ଅଛି। ଆଶା କରୁଛି ଏହି ନୋଟଗୁଡିକ ମଧ୍ୟ ଫେରି ଆସିବ।’
ଏହାପୂର୍ବରୁ ଗଭର୍ଣ୍ଣର କହିଥିଲେ ଯେ ଫେରିଆସିଥିବା ୨୦୦୦ ଟଙ୍କିଆ ନୋଟର ୮୭ ପ୍ରତିଶତ ବ୍ୟାଙ୍କରେ ଜମା ହିସାବରେ ଫେରି ଆସିଛି। ଏହି ମାସ ଆରମ୍ଭରେ, ଆରବିଆଇ ଅକ୍ଟୋବର ୭ ପର୍ଯ୍ୟନ୍ତ ୨୦୦୦ ଟଙ୍କା ନୋଟ ପ୍ରତ୍ୟାହାର ପାଇଁ ସ୍ୱତନ୍ତ୍ର ଅଭିଯାନକୁ ବଢ଼ାଇ ଦେଇଥିଲା | ଅକ୍ଟୋବର ୭ ପରେ ବ୍ୟାଙ୍କ ଶାଖାରେ ନୋଟ୍ ଜମା ଏବଂ ବିନିମୟ ସୁବିଧା ବନ୍ଦ ହେବାପରେ ଅକ୍ଟୋବର ୮ରୁ ଲୋକଙ୍କୁ ରିଜର୍ଭ ବ୍ୟାଙ୍କର ୧୯ଟି କାର୍ଯ୍ୟାଳୟରେ ନୋଟ୍ ବିନିମୟ କରିବାକୁ ସୁବିଧା ଦିଆଯାଇଥିଲା |
କୌଣସି ବ୍ୟକ୍ତି କିମ୍ବା ଅନୁଷ୍ଠାନ ଥରକେ ଆରବିଆଇରେ ୨୦୦୦୦ ଟଙ୍କାର ୨୦୦୦ ଟଙ୍କିଆ ନୋଟ ବଦଳାଇପାରିବେ | ତେବେ ଆରବିଆଇ କାର୍ଯ୍ୟାଳୟ ଜରିଆରେ ବ୍ୟାଙ୍କ ଆକାଉଣ୍ଟରେ ୨୦୦୦ ଟଙ୍କା ନୋଟ୍ ଜମା କରିବାର ରାଶି ଉପରେ କୌଣସି ସୀମା ନାହିଁ। ଆରବିଆଇ ଚଳିତ ବର୍ଷ ମେ ୧୯ରେ ପ୍ରଚାରରୁ ୨୦୦୦ ଟଙ୍କିଆ ନୋଟ ପ୍ରତ୍ୟାହାର କରିବାକୁ ଘୋଷଣା କରିଥିଲା।
