ପାଲଲହଡା,01/04: ସୋମବାର ପାଲଲହଡାକୁ ଦିନିକିଆ ଗସ୍ତରେ ଆସିଥିଲେ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶରାମ ସିଂ ଖୁଣ୍ଟିଆ | ମନ୍ତ୍ରୀଙ୍କ ଗସ୍ତ ଅବସରରେ ବନାଗ୍ନୀ ଓ ଗଜ ସୁରକ୍ଷା ଉପରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ସଚେତନତା ସଭାର ଆୟୋଜନ କରା ଯାଇ ଭାଷଣବାଜି ଚାଲିଥିବାବେଳେ ସେପଟେ ପାଲଲହଡା ରେଞ୍ଜ ଅନ୍ତର୍ଗତ ସଇଡ଼ା ଗ୍ରାମ ପଞ୍ଚାୟତର ସଇଡ଼ା ଗ୍ରାମ ବିଜୁ ସାହି ନିକଟସ୍ଥ ସଂରକ୍ଷିତ ଜଙ୍ଗଲ ନାଳ ଭିତରେ ଏକ ଦନ୍ତା ହାତୀର ମୃତ୍ୟୁ ହେବା ଘଟଣା ବନ ବିଭାଗର ସ୍ୱଚ୍ଚତା ଉପରେ ପ୍ରଶ୍ନ ଚିହ୍ନ ଲଗାଇଛି|
ପ୍ରାପ୍ତ ଖବରରୁ ପ୍ରକାଶ ପାଲଲହଡା ବନାଞ୍ଚଳ ଅନ୍ତର୍ଗତ ସଇଡା ଗ୍ରାମର ବିଜୁ ସାହି ସଂରକ୍ଷିତ ଜଙ୍ଗଲ ଭିତରୁ ଥିବା ଏକ ନାଳରୁ ଦନ୍ତା ହାତୀର ମୃତଦେହ ପ୍ରଥମେ ଗାଁ ଲୋକ ଠାବ କରି ବନ କର୍ମଚାରୀଙ୍କୁ ଖବଇ ଦେଇ ଥିଲେ| ଖବର ପାଇ ପାଲଲହଡା ବନାଞ୍ଚଳ ଅଧିକାରୀ ରମେଶ ଚନ୍ଦ୍ର ତ୍ରିପାଠୀଙ୍କ ସହିତ ତାଙ୍କ ଅଧୀନରେ ଥିବା ଜମରଡିହ ବିଟର ବନପାଳ, ବନରଖି ପ୍ରମୁଖ ସଦଳବଳେ ତୁରନ୍ତ ଘଟଣା ସ୍ଥଳରେ ପହଞ୍ଚି ମୃତ୍ୟୁ ହୋଇଥିବା ଦନ୍ତା ହାତୀକୁ ଠାବ କରିଥିଲେ| ପରବର୍ତ୍ତୀ ସମୟରେ ଦେବଗଡ଼ ବନଖଣ୍ଡ ଅଧିକାରୀ, ଆରସିସିଏଫ, ଖମାର ବନାଞ୍ଚଳ ଅଧିକାରୀ ଓ ପଶୁ ଚିକିତ୍ସା ଅଧିକାରୀ ପହଂଚି ଶବ ବ୍ୟବଛେଦରେ ସାମିଲ ହୋଇ ଏହାର ନମୁନା ଗ୍ରହଣ କରି ସମସ୍ତଙ୍କ ଉପସ୍ଥିତିରେ ଦାନ୍ତ ଦୁଇଟି ଉଦ୍ଧାର କରିଛନ୍ତି|
ଖବରଲେଖା ପର୍ଯ୍ୟନ୍ତ ଶବ ବ୍ୟବଛେଦ ଜାରିରହିଛି| ହାତୀଟି ଖାଇବାକୁ ନପାଇ ଖାଦ୍ୟ ଅନ୍ୱେଷଣରେ ଏଣେ ତେଣେ ଏକୁଟିଆ ବୁଲୁଥିବାର ସମ୍ପୃକ୍ତ ଗ୍ରାମବାସୀଙ୍କ ସୂତ୍ରରୁ ପ୍ରକାଶ ହୋଇଥିବା ବେଳେ ଖାଇବାକୁ ନପାଇ ଦୁର୍ବଳ ଯୋଗୁଁ ହାତୀଟିର ମୃତ୍ୟୁ ଘଟିଛି ନା ଅନ୍ୟ କୌଣସି କାରଣ ପାଇଁ ମୃତ୍ୟୁ ଘଟିଛି ତାହା ଶବ ବ୍ୟବଚ୍ଛେଦ ରିପୋର୍ଟ ପରେ ସ୍ପଷ୍ଟ ଜଣାପଡିବ ବୋଲି ତଦନ୍ତକାରୀ ଅଧିକାରୀ ଶ୍ରୀଯୁକ୍ତ ତ୍ରିପାଠୀ ସୂଚନା ଦେଇଛନ୍ତି|
ତେବେ ସରକାର ଜଙ୍ଗଲ ଜନ୍ତୁ ଓ ହାତୀ ମାନଙ୍କ ସୁରକ୍ଷା ପାଇଁ କୋଟି କୋଟି ଟଙ୍କା ପାଣି ପରି ଖର୍ଚ୍ଚ କରୁଛନ୍ତି | ପାଲଲହଡା ଅଞ୍ଚଳରେ ମଧ୍ୟ ଜଙ୍ଗଲୀ ହାତୀ ସୁରକ୍ଷା ପାଇଁ ବ୍ୟାପକ ବ୍ୟବସ୍ଥା କରିବା ସହିତ ଗଜ ସାଥି ଠାରୁ ଆରମ୍ଭ କରି ଅନେକ ବନ କର୍ମଚାରୀ ନିୟୋଜିତ ହୋଇଛନ୍ତି ମାତ୍ର ଏଠି କେତେବେଳେ ମଣିଷ ହାତୀ ଲଢେ଼ଇରେ ମଣିଷର ମୃତ୍ୟୁ ହଉଛି ତ କେତେବେଳେ ହାତୀର ମୃତ୍ୟୁ ହଉଛି | ଆଉ ବନ ବିଭାଗ ହାତୀ ଜଗିବା ନାଁରେ ହାତୀ ମାନଙ୍କ କୌଣସି ଟେର ପାଇ ପାରୁ ନ ଥିବା ଏକ ପରୀତାପ ର ବିଷୟ ପାଲଟିଛି l ଏଠି ପ୍ରଶ୍ନ ଉଠେ ସରକାରଙ୍କ ଏତେ ବ୍ୟବସ୍ଥା କେଉଁ କାମକୁ ?
ରିପୋର୍ଟ: ସୁବ୍ରତ ଦାସ
