(ସତ୍ୟପାଠ ବ୍ୟୁରୋ) ଭୁବନେଶ୍ୱର : ମହାରାଷ୍ଟ୍ରରେ କ୍ଷମତାରେ ଥିବା ମହା ବିକାଶ ଅଘାଡି ସରକାରରେ ବିଭିନ୍ନ ସମୟରେ ବିବାଦ ଦେଖାଦେଇଛି। ଗଠବନ୍ଧନରେ ଥିବା ୩ ଦଳର ନେତା ସେମାନଙ୍କ ବୟାନକୁ ନେଇ ସର୍ବଦା ଚର୍ଚ୍ଚାରେ ରୁହନ୍ତି। ଗତ କିଛିଦିନ ହେବ ମହାରାଷ୍ଟ୍ର କଂଗ୍ରେସ ମୁଖ୍ୟ ନାନା ପାଟୋଲେ ନଜର ବୟାନକୁ ନେଇ ଚର୍ଚ୍ଚାରେ ରହି ଆସିଛନ୍ତି। ଏବେ ସେ କହିଛନ୍ତି ଯେ, ମହା ବିକାଶ ଅଘାଡି ସରକାରର ରିମୋଟ କଣ୍ଟ୍ରୋଲ ହେଉଛନ୍ତି ଏନସିପି ମୁଖ୍ୟ ଶରଦ ପାୱାର। ସେ କହିଛନ୍ତି, “ଶରଦ ପାୱାର ହେଉଛନ୍ତି ଏନସିପି ମୁଖ୍ୟ। ମୁଁ କଂଗ୍ରେସ ମୁଖ୍ୟ। ତେଣୁ ଆମେ ଆମ ଦଳକୁ ସଶକ୍ତ କରିବାକୁ ଉଦ୍ୟମ କରିବୁ। ସେ ଜଣେ ରିମୋଟ କଣ୍ଟ୍ରୋଲ। କିନ୍ତୁ ଏହି ମହା ବିକାଶ ଅଘାଡ଼ି ସରକାର ଗଠନ କରିବାରେ ସେ ବଳିଷ୍ଠ ଭୂମିକା ଗ୍ରହଣ କରିଛନ୍ତି। ଶରଦ ପାୱାର ଆମକୁ ଗାଇଡ କରନ୍ତି। ତେଣୁ ସେ ଜଣେ ରିମୋଟ କଣ୍ଟ୍ରୋଲ।”
ସରକାରରେ ତିନି ନମ୍ବର ସ୍ଥାନରେ ଥିବା କଂଗ୍ରେସ ପାର୍ଟି ଏବେ ମହାରାଷ୍ଟ୍ରର ଏକ ନମ୍ବର ଦଳ ହେବାର ସ୍ୱପ୍ନ ଦେଖୁଛି। ଏବଂ ଏଥିପାଇଁ ସଂଗଠନକୁ ମଜବୁତ କରିବାକୁ ଚେଷ୍ଟା କରୁଛି, କିନ୍ତୁ ନେତାଙ୍କ ମଧ୍ୟରେ ଏକତା ଦେଖାଯାଉ ନାହିଁ। ଏହାର ଏକ ଉଦାହରଣ ଦେଖିବାକୁ ମିଳିଛି ଯେତେବେଳ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ଏବଂ ଦର ବୃଦ୍ଧି ବିରୋଧରେ ଦଳ ଏକ ସାଇକେଲ ମାର୍ଚ୍ଚ କରି ରାଜ ଭବନକୁ ଯାଇ ରାଜ୍ୟପାଳଙ୍କ ନିକଟରେ ଏକ ସ୍ମାରକପତ୍ର ଦାଖଲ କରିଥିଲା। କିନ୍ତୁ ଏଥିରେ ଦଳର ବଡ ନେତା ତଥା ମନ୍ତ୍ରୀ ବିଜୟ ଏଥିରେ ଯୋଗ ଦେଇନଥିଲେ। ପଛରେ ଜଣା ପଡିଥିଲା ଯେ ତାଙ୍କୁ ସୂଚନା ଦିଆଯାଇ ନଥିଲା।
ନିଜ ଦଳ କଂଗ୍ରେସକୁ ରାଜ୍ୟରେ ଏକ ନମ୍ବର କରିବାକୁ ଚେଷ୍ଟା କରୁଥିବା ନାନା ପାଟୋଲ ଏହାର ଯାଞ୍ଚ କରିବେ ବୋଲି କହିଛନ୍ତି। ସେ କହିଛନ୍ତି ଯେ, ” ବୋଧହୁଏ ସେମାନଙ୍କର କିଛି ଗୁରୁତ୍ୱପୂର୍ଣ୍ଣ କାର୍ଯ୍ୟ ଅଛି ସେଥିପାଇଁ ସେ ଆସି ନାହାନ୍ତି। ରାଜ୍ୟପାଳଙ୍କୁ ଭେଟିବା ପରେ ନାନା ପାଟୋଲ ଗଣମାଧ୍ୟମ ସହ କଥାବାର୍ତ୍ତା କରିବାବେଳେ ସେ ସ୍ୱୀକାର କରିଛନ୍ତି ଯେ ଶରଦ ପାୱାରଙ୍କ ପାଖରେ ମହା ବିକାଶ ଅଘାଡି ସରକାରର ରିମୋଟ ଅଛି। ସୂଚନା ମୁତାବକ କଂଗ୍ରେସ ଦଳ ମନ୍ତ୍ରୀଙ୍କ କାର୍ଯ୍ୟରେ ଖୁସି ନୁହଁନ୍ତି ତେଣୁ ସେମାନଙ୍କର କାର୍ଯ୍ୟଗୁଡ଼ିକ ସମୀକ୍ଷା କରାଯାଉଛି। କିଛି ମନ୍ତ୍ରୀଙ୍କୁ ଖୁବ୍ ଶୀଘ୍ର ହଟାଇ ଦିଆଯାଇପାରେ । ଏହା ମଧ୍ୟ ଆଲୋଚନା ଚାଲିଛି ଯେ ନାନା ପାଟୋଲ ନିଜେ ମନ୍ତ୍ରୀ ହେବାକୁ ଚାହୁଁଛନ୍ତି।
ଏହାପୂର୍ବରୁ ବୁଧବାର ଗଣମାଧ୍ୟମ ସହ କଥାବାର୍ତ୍ତା ବେଳେ ନାନା କହିଥିଲେ ଯେ ଆସନ୍ତା ନିର୍ବାଚନରେ କଂଗ୍ରେସ ଦଳ ଏକୁଟିଆ ଲଢିବେ କି ନାହିଁ ତାହା ଦଳ ନିଷ୍ପତ୍ତି ନେବ। ନାନା ପାଟୋଲ ସ୍ପଷ୍ଟ କରିଛନ୍ତି ଯେ ସେ ଏନସିପି ଏବଂ ଶିବସେନାଙ୍କ ବିରୋଧରେ କେବେ କହି ନାହାଁନ୍ତି। ସେ ବିଜେପି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନୀତି ବିରୋଧରେ ଲଢେଇ ଜାରି ରଖିବେ। ସେଥିପାଇଁ ହାଇକମାଣ୍ଡ ତାଙ୍କୁ ପଠାଇଛନ୍ତି।
