ପଦ୍ମପୁର: ପୁଣି ଥରେ ନିଜ ସ୍ଥିତି ଜାହିର କଲେ ମାଓବାଦୀ | ବରଗଡ ଜିଲ୍ଲା ଅଞ୍ଚଳରେ ଲଗାଇଲେ ମାଓ ବ୍ୟାନର । ପାଇକମାଲରୁ ପଦ୍ମପୁର ରାସ୍ତା ଭୁଲିଆବନ୍ଧ ଛକ ନିକଟରେ ମାଓ ପୋଷ୍ଟର ଲଗାଯାଇଛି । ପୋଷ୍ଟରରେ କିଛି ଦୋକାନୀଙ୍କୁ ତାଗିଦ କରାଯାଇଛି । ଯେଉଁମାନେ ବେଶୀ ପରିମାଣର ରାସନ ସାମଗ୍ରୀ କିଣୁଛନ୍ତି ସନ୍ଦେହରେ ପୋଲିସକୁ ଖବର ଦେଉଛନ୍ତି ଦୋକାନୀ, ସେମାନଙ୍କୁ ତାଗିଦ କରିଛନ୍ତି ମାଓବାଦୀ । ସେମାନେ ଜାଣିଛନ୍ତି କେଉଁମାନେ ଖବର ଦେଉଛନ୍ତି, ତେଣୁ ସେମାନେ ସୁଧୁରି ଯାଆନ୍ତୁ ନଚେତ ଦଣ୍ଡିତ ହେବେ ବୋଲି ଚେତାବନୀ ଦେଇଛନ୍ତି ମାଓବାଦୀ ସଂଗଠନ ।
ବିଭିନ୍ନ ଗ୍ରାମର କିଛି ଲୋକଙ୍କୁ ସେମାନେ ପୋଲିସ ଇନଫର୍ମର ବୋଲି ସନ୍ଦେହ କରୁଛନ୍ତି । ସେମାନଙ୍କ ନାମ ଓ ଗ୍ରାମର ନାମ ଲେଖା ହୋଇଛି ଏବଂ ସୁଧୁରିଯିବା ପାଇଁ ଚେତାବନୀ ଦେଇଛନ୍ତି ମାଓବାଦୀ । ମାଓବାଦୀ ସଂଗଠନ (BBM), ବରଗଡ଼, ବଲାଙ୍ଗୀର ଓ ମହାସମୁନ୍ଦ ସଙ୍ଗଠନ ଏହି ବ୍ୟାନର ଲଗାଇଛି ।
ନିକଟରେ ମାଓବାଦୀ ମାନେ କଳାହାଣ୍ଡିରେ ଲଙ୍କାକାଣ୍ଡ ଘଟାଇଥିଲେ । ନିଆଁ ଲଗାଇ ଜାଳି ଦେଇଥିଲେ ୬ଟି ଗାଡି । ନିଜ ଉପସ୍ଥିତି ଜାହିର କରିବାକୁ ଯାଇ ରାସ୍ତା କାମକୁ ବିରୋଧ କରି ଗାଡି ଜାଳି ଦେଇଥିଲେ | ଏଥିସହ ପୋଷ୍ଟର ଲଗାଇ ଚେତାବନୀ ଦେଇଥିଲେ ଲାଲ ସଂଗଠନ |
