ମୁମ୍ବାଇ: ମହାରାଷ୍ଟ୍ର ଜାରୀ ରହିଛି ରାଜନୈତିକ ସଙ୍କଟ । ଉଦ୍ଧବ ସରକାରଂକ ଗାଦି ଟଳମଳ ହେଉଥିବା ବେଳେ, ସିନ୍ଧେଙ୍କ ବିଦ୍ରୋହୀ ସେନା ଏବେ ଉଦ୍ଧବ ଙ୍କ ପାଇଁ ଭାରି ପଡିଛନ୍ତି । ସରକାର ବଞ୍ଚାଇବାକୁ ଉଦ୍ଧବ ସରକାର ଚେଷ୍ଟା ଚଳାଇଥିବା ବେଳେ, ସିନ୍ଧେ ବି ସରକାର ଭାଙ୍ଗିବାକୁ ପୁରା ଦମ୍ ଲଗାଇଛନ୍ତି । ଏହାରି ଭିତରେ ଆଉ ଏକ ଗୁରୁତ୍ବପୂର୍ଣ୍ଣ ଖବର ସାମ୍ନାକୁ ଆସିଛି ।
ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେପି ନେତା ଦେବେନ୍ଦ୍ର ଫଡନାବିସଙ୍କୁ ଭେଟିଛନ୍ତି ବିଦ୍ରୋହୀ ନେତା ଏକନାଥ ସିନ୍ଧେ । ଉଭୟଙ୍କ ମଧ୍ୟରେ ଗୁପ୍ତ ବୈଠକ ହୋଇଥିବା ବିଶେଷ ସୂତ୍ରରୁ ଜଣାପଡିଛି ।
ଯାହା ସୂଚନା ମିଳିଛି, ଶୁକ୍ରବାର ମଧ୍ୟରାତ୍ରିରେ ଏକନାଥ ସିନ୍ଧେ ଏକ ସ୍ବତନ୍ତ୍ର ବିମାନ ଯୋଗେ ଆସାମରୁ ଗୁଜୁରାଟର ଭଦୋଦରା(Vadodara) ଯାଇଥିଲେ । ସେଠାରେ ସେ ଦେବେନ୍ଦ୍ର ଫଡନାବିସଙ୍କ ସହ ଗୁପ୍ତ ବୈଠକ କରିଥିଲେ । ଉଭୟ ନେତାଙ୍କ ମଧ୍ୟରେ ଦୀର୍ଘ ସମୟ ପର୍ଯ୍ୟନ୍ତ ଆଲୋଚନା ହୋଇଥିଲା । ବୈଠକରେ ମହାରାଷ୍ଟ୍ରରେ ନୂଆ ସରକାର ଗଠନ ପାଇଁ ଭିତ୍ତିଭୂମି ପଡିଛି ବୋଲି କୁହାଯାଉଛି । ସୂତ୍ରରୁ ଏହା ମଧ୍ୟ ଜଣାପଡିଛି ଯେ, ଗୃହମନ୍ତ୍ରୀ ଅମିତ ଶାହ ମଧ୍ୟ ସେଦିନ ରାତିରେ ଭଦୋଦରାରେ ଥିଲେ । ଚଳିତ ସପ୍ତାହରେ ସିନ୍ଧେ ଓ ଫଡନାବିସଙ୍କ ମଧ୍ୟରେ ପୁଣିଥରେ ଭେଟଘାଟ ହୋଇପାରେ ।ଫଡନାବିସଙ୍କ ସହ ବୈଠକ ପରେ ସିନ୍ଧେ ପୁଣି ଥିରେ ଗୌହାଟୀର ବିଦ୍ରୋହୀ ସେନା ଶିବିରକୁ ଫେରିଥିଲେ । ସେପଟେ ଫଡନାବିସ ମଧ୍ୟ ମୁମ୍ବାଇ ଫେରିଯାଇଥିଲେ । ଗୁଜୁରାଟ ଗସ୍ତ ପୂର୍ବରୁ ଗୁରୁବାର ସିନ୍ଧେ ଦାବି କରିଥିଲେ ଯେ, ଗୋଟିଏ ବଡ ରାଜନୈତିକ ଦଳ ତାଙ୍କ ନିଷ୍ପତ୍ତିକୁ ସମର୍ଥନ କରୁଛି । ସେହି ବଡ ଦଳ ଭାରତୀୟ ଜନତା ପାର୍ଟି ହୋଇଥିବା ସିନ୍ଧେଙ୍କ ଏବେ ପ୍ରତୀତ ହେଉଛି ।
