(ସତ୍ୟପାଠ ବ୍ୟୁରୋ) ଭୁବନେଶ୍ବର : ଭାରତକୁ ୨୦୨୭ ସୁଦ୍ଧା ମିଳିପାରେ ପ୍ରଥମ ମହିଳା ପ୍ରଧାନ ବିଚାରପତି । ଏଥିପାଇଁ ମଙ୍ଗଳବାର ସୁପ୍ରିମକୋର୍ଟର ପ୍ରଧାନ ବିଚାରପତି ଏନ. ଭି ରମନ୍ନାଙ୍କ ନେତୃତ୍ୱାଧୀନ ଏହି କଲେଜିୟମ ମୋଟ୍ ୯ ଜଣଙ୍କ ନାମ ସୁପାରିଶ କରିଛନ୍ତି। ଯେଉଁଥିରେ ତିନି ଜଣ ମହିଳା ରହିଛନ୍ତି। ତେଣୁ ଏହି ତିନି ଜଣଙ୍କ ମଧ୍ୟରେ କେହି ଜଣେ ୨୦୨୭ ସୁଦ୍ଧା ଦେଶର ପ୍ରଥମ ମହିଳା ପ୍ରଧାନ ବିଚାରପତି ହୋଇପାରନ୍ତି ବୋଲି କୁହାଯାଉଛି।
କଲେଜିୟମ ସୁପାରିଶ କରିଥିବା ନାମ ଗୁଡ଼ିକ ମଧ୍ୟରେ କର୍ଣ୍ଣାଟକ ହାଇକୋର୍ଟର ବିଚାରପତି ବିବି ନାଗରଥନାଙ୍କ ନାମ ମଧ୍ୟ ରହିଛି। ଯାହାଙ୍କର ଏବେ ପଦୋନ୍ନତି ହୋଇଛି। ନ୍ୟାୟ ନାଗରାଥନାଙ୍କ ବ୍ୟତୀତ ପାଞ୍ଚ ସଦସ୍ୟ ବିଶିଷ୍ଟ କଲେଜିୟମ ଦ୍ୱାରା ମନୋନୀତ ହୋଇଥିବା ଅନ୍ୟ ଦୁଇଜଣ ମହିଳା ବିଚାରପତି ହେଉଛନ୍ତି ତେଲେଙ୍ଗାନା ହାଇକୋର୍ଟର ହିମା କୋହଲି ଏବଂ ଗୁଜରାଟ ହାଇକୋର୍ଟର ବିଚାରପତି ବେଲା ତ୍ରିବେଦୀ।
ତେବେ ବରିଷ୍ଠ ଆଡଭୋକେଟ୍ ପିଏସ୍ ନରସିଂହ ବେଞ୍ଚରେ ସିଧାସଳଖ ନିଯୁକ୍ତି ପାଇଁ କଲେଜିୟମର ପସନ୍ଦ ଥିଲେ। ନରସିଂହଙ୍କ ସୁପାରିଶ ନ୍ଯାୟମୂର୍ତ୍ତୀ ରୋହିଣ୍ଟନ୍ ଏଫ୍ ନରିମାନଙ୍କ ଅବସର ପରେ ଏକ ସପ୍ତାହ ତଳେ ଆସିଛି, ଯିଏକି ଭାରତର ଆଇନ ଇତିହାସରେ ପଞ୍ଚମ ଓକିଲ ଭାବରେ ବାରରୁ ସିଧାସଳଖ ନିଯୁକ୍ତ ହୋଇଥିଲେ।
ସୂଚନା ମୁତାବକ ସେମାନେ ଏଚ୍.ଟି.ଙ୍କୁ କହିଛନ୍ତି ଯେ କଲେଜିୟମ୍ ଦ୍ୱାରା ଚୂଡ଼ାନ୍ତ ହୋଇଥିବା ଅନ୍ୟ ନାମଗୁଡ଼ିକରେ ଜଷ୍ଟିସ୍ ଅକ୍ଷୟ ଶ୍ରୀନିବାସ୍ ଓକା (କର୍ଣ୍ଣାଟକ ହାଇକୋର୍ଟର ପ୍ରଧାନ ବିଚାରପତି), ବିକ୍ରମ ନାଥ (ଗୁଜୁରାଟ ହାଇକୋର୍ଟର ପ୍ରଧାନ ବିଚାରପତି), ଜିତେନ୍ଦ୍ର କୁମାର ମହେଶ୍ୱରୀ (ସିକ୍କିମ୍ ହାଇକୋର୍ଟର ମୁଖ୍ୟ ବିଚାରପତି) , ସି.ଟି. ରବିକୁମାର (କେରଳ ହାଇକୋର୍ଟର ବିଚାରପତି) ଏବଂ ଏମ.ଏମ ସୁନ୍ଦରଶ (କେରଳ ହାଇକୋର୍ଟର ବିଚାରପତି) ଅଛନ୍ତି । ଏହି ନଅ ଜଣ ବିଚାରପତିଙ୍କ ମଧ୍ୟରୁ ତିନିଜଣ ସର୍ବୋଚ୍ଚ ନ୍ୟାୟାଳୟରେ CJI ହୋଇପାରନ୍ତି। ସୁପ୍ରିମକୋର୍ଟରେ ଥିବା ଏହି କଲେଜିୟମରେ ସିଜେଆଇ ଏନଭି ରାମନା ଏବଂ ଜଷ୍ଟିସ ଉଦୟ ୟୁ ଲଲିତ, ଏମ ଖାନୱିଲକର, ଧନଞ୍ଜୟ ୟ ଚନ୍ଦ୍ରଚୁଡ ଏବଂ ଏଲ ନାଗେଶ୍ୱରା ରାଓ ରଥିଲେ। ଗତ ୨୧ ମାସ ମଧ୍ୟରେ ଏହା ପ୍ରଥମ କଲେଜିୟମ ଥିଲା ଯେଉଁଥିରେକି ପାଞ୍ଚଜଣ ବରିଷ୍ଠ ବିଚାରପତି ଶୀର୍ଷ କୋର୍ଟରେ ନିଯୁକ୍ତି ପାଇଁ କେନ୍ଦ୍ର ସରକାରଙ୍କ ନାମ ପଠାଇବାରେ ସହମତି ପ୍ରକାଶ କରିଛନ୍ତି।
୨୦୧୯ ମସିହା ନଭେମ୍ୱର ମାସରେ ପ୍ରଧାନ ବିଚାରପତି ଭାବରେ ଜଷ୍ଟିସ ରଞ୍ଜନ ଗୋଗୋଇ ଅବସର ନେଇଥିଲେ। ଏହାପରେ କଲେଜିୟମ ସୁପ୍ରିମକୋର୍ଟରେ ବିଚାରପତି ନିଯୁକ୍ତି ନେଇ କେନ୍ଦ୍ର ସରକାରଙ୍କୁ ସୁପାରିଶ କରିନଥିଲେ। ଅଗଷ୍ଟ ୧୨ରେ ଜଷ୍ଟିସ ନରିମନ ଅବସର ଗ୍ରହଣ କରିବା ପରେ ସୁପ୍ରିମକୋର୍ଟରେ ୯ଟି ବିଚାରପତି ପଦବୀ ଖାଲି ହୋଇଛି। ଆଗକୁ ଅଗଷ୍ଟ ୧୮ରେ ଜଷ୍ଟିସ ନବୀନ ସିହ୍ନା ଅବସର ଗ୍ରହଣ କରିବେ। ଏହାପରେ ୧୦ଟି ପଦ ଖାଲି ହୋଇଯିବ।
ଫେବୃଆରୀ ୨୧ ର HT ରିପୋର୍ଟ ଅନୁଯାୟୀ, କଲେଜିୟମରେ ଦେଖାଦେଇଥିବା ଅସନ୍ତୋଷ କାରଣରୁ , ତ୍ରିପୁରା ହାଇକୋର୍ଟର ପ୍ରଧାନ ବିଚାରପତି ଅକିଲ ଏ କୁରେଶୀଙ୍କୁ ବିଚାରପତି ଭାବରେ ସୁପାରିଶ କରିବା ଉପରେ ନରମାନଙ୍କ ଦୃଢ ଆଭିମୁଖ୍ୟ ଯୋଗୁଁ ଗତିରୋଧ ଜାରି ରହିଥିଲା।
ଜଷ୍ଟିସ ନରିମାନ ଦୃଢୋକ୍ତି ପ୍ରକାଶ କରିଛନ୍ତି ଯେ ପାଞ୍ଚଜଣ ବରିଷ୍ଠ ବିଚାରପତିଙ୍କ କଲେଜିୟମ ଦ୍ବାରା ଯେକୌଣସି ସୁପାରିଶ କରାଯିବା ଉଚିତ୍, ଜଷ୍ଟିସ୍ କୁରେଶୀଙ୍କୁ ସୁପାରିଶ କରିବା ଉଚିତ, ଯିଏକି ହାଇକୋର୍ଟର ବିଚାରପତିଙ୍କ ସର୍ବ-ଭାରତ ବରିଷ୍ଠତା ତାଲିକାରେ ଦୁଇ ନମ୍ବର ସ୍ଥାନରେ ଥିଲେ। କଲେଜିୟମ ମଧ୍ୟରେ ସହମତି ଅଭାବରୁ ସେହି ଦିନଠାରୁ ସର୍ବୋଚ୍ଚ ନ୍ୟାୟାଳୟରେ ବିଚାରପତିଙ୍କ ନିଯୁକ୍ତି ସ୍ଥଗିତ ରହିଲା ।
ପୂର୍ବ CJI ଏସ୍ ଏ ବବଡେଙ୍କ ୧୭ ମାସର କାର୍ଯ୍ୟକାଳ ସମୟରେ ନ୍ୟାୟିକ ଇତିହାସରେ ୧୯୯୦ ଦଶକରେ କଲେଜିୟମ ବ୍ୟବସ୍ଥା ଆସିବା ପରେ ସୁପ୍ରିମକୋର୍ଟଙ୍କ ପାଇଁ କୌଣସି ସୁପାରିଶ ନକରି CJI କାର୍ଯ୍ୟାଳୟ ଛାଡିଥିଲେ। ଉଭୟ ଜଷ୍ଟିସ୍ ବବଡେ ଏବଂ ନରିମାନ ବିଭିନ୍ନ ପ୍ଲାଟଫର୍ମରେ କହିଥିଲେ ଯେ ଦେଶର ପ୍ରଥମ ମହିଳା CJI ହେବାର ସମୟ ଆସିଛି।
ସୁପ୍ରିମକୋର୍ଟରେ ଏବେ ଜଣେ ମହିଳା ବିଚାରପତି ଜଷ୍ଟିସ୍ ଇନ୍ଦିରା ବାନାର୍ଜୀ ରହିଛନ୍ତି। ଜଷ୍ଟିସ୍ ବାନାର୍ଜୀ ସେପ୍ଟେମ୍ବର ୨୦୨୨ରେ ଅବସର ନେବେ। ଏପର୍ଯ୍ୟନ୍ତ ସୁପ୍ରିମକୋର୍ଟରେ କେବଳ ୮ ଜଣ ମହିଳା ବିଚାରପତି ନିଯୁକ୍ତ ହୋଇଛନ୍ତି। ଯଦି ସରକାର କଲେଜିୟମର ସୁପାରିଶକୁ ଗ୍ରହଣ କରନ୍ତି, ତେବେ ସୁପ୍ରିମକୋର୍ଟରେ ଥିବା ସମସ୍ତ ଖାଲି ପଦବୀ ପୂରଣ ହେବ ଏବଂ ବିଚାରପତିଙ୍କ ସଂଖ୍ୟା ୩୩କୁ ବୃଦ୍ଧି ପାଇବ।
ସୂଚନାଯୋଗ୍ୟ ଯେ କଲେଜିୟମ ସୁପାରିଶ କରିଥିବା ନାମଗୁଡିକ କେନ୍ଦ୍ର ଆଇନ ମନ୍ତ୍ରଣାଳୟ ନିକଟରକୁ ପଠାଯିବ। ଏହି ନାମକୁ ନେଇ କୌଣସି ଆପତ୍ତି ଥିଲେ କେନ୍ଦ୍ର ସରକାର ପୁଣି ଥରେ ସମୀକ୍ଷା ପାଇଁ କଲେଜିୟମକୁ କରିବାକୁ କହିପାରିବେ। ହେଲେ କଲେଜିୟମ ଯଦି ସମାନ ନାମ ପୁଣିଥରେ କେନ୍ଦ୍ର ଆଇନ୍ ମନ୍ତ୍ରାଳୟକୁ ପଠାଇବେ ତାହେଲେ କେନ୍ଦ୍ର ସରକାର ସେହି ନାମକୁ ଅନୁମୋଦନ ଦେବାକୁ ବାଧ୍ୟ ହେବେ।
