(ସତ୍ୟପାଠ ବ୍ୟୁରୋ) ଭୁବନେଶ୍ବର : ଟୋକିଓ ଅଲିମ୍ପିକ୍ସରେ ନିଜର ଦମଦାର ପ୍ରଦର୍ଶନ ଦ୍ୱାରା ସମସ୍ତଙ୍କ ହୃଦୟ ଜିତିଥିବା ଭାରତୀୟ ମହିଳା ହକି ଟିମ୍ ର ଖେଳାଳି ବନ୍ଦାନା କାଟାରିଆଙ୍କୁ ନେଇ ଏବେ ଚର୍ଚ୍ଚା ଜୋର୍ ଧରିଛି। ଟିମ୍ ପଦକରୁ ବଞ୍ଚିତ ହୋଇଥିଲେ ମଧ୍ୟ ତାଙ୍କର ଚମତ୍କାର ପ୍ରଦର୍ଶନ ପାଇଁ ସେ ପ୍ରଶଂସା ସାଉଁଟୁଛନ୍ତି। ବର୍ତ୍ତମାନ ତାଙ୍କୁ ଉତ୍ତରାଖଣ୍ଡ ସରକାରଙ୍କ ଦ୍ୱାରା ବେଟି ବାଚାଓ, ବେଟି ପଢ଼ାଓ ଅଭିଯାନର ବ୍ରାଣ୍ଡ ଆମ୍ବାସାଡ଼ର କରାଯାଇଛି।
ରାଜ୍ୟ କ୍ରୀଡ଼ା ମନ୍ତ୍ରୀ ଅରବିନ୍ଦ ପାଣ୍ଡେ ରବିବାର ଦିନ ଏହା ଘୋଷଣା କରିଛନ୍ତି। କ୍ରୀଡ଼ା ମନ୍ତ୍ରୀ ହରିଦ୍ୱାରର ବନ୍ଦାନା କାଟାରିଆଙ୍କ ଘରେ ପହଞ୍ଚି ସେଠାରେ ତାଙ୍କ ମା’ ଓ ଭାଇମାନଙ୍କୁ ସାକ୍ଷାତ କରିବା ସଙ୍ଗେ ସଙ୍ଗେ ସେମାନଙ୍କୁ ସମ୍ମାନିତ କରିଥିଲେ।
ଏହି ଅବସରରେ ମନ୍ତ୍ରୀ କହିଛନ୍ତି ବନ୍ଦନାଙ୍କ ପାଇଁ ଆମେମାନେ ଗର୍ବିତ ହେବା ଉଚିତ୍। ସେ ତାଙ୍କ ଚମତ୍କାର ପ୍ରଦର୍ଶନ ଏବଂ ଖେଳ ପ୍ରତିଭା ଆଧାରରେ ସମଗ୍ର ବିଶ୍ୱରେ ଭାରତ ପକ୍ଷରୁ ଖେଳିଛନ୍ତି । ରାଜ୍ୟକୁ ଫେରିବା ପରେ ତାଙ୍କୁ ସରକାର ସମ୍ମାନିତ କରିବେ ବୋଲି କହିଛନ୍ତି ।
ଏହି ଅବସରରେ ବିଧାୟକ ଆଦେଶ ଚୌହାନ, ଅତିରିକ୍ତ ଜିଲ୍ଲା ମାଜିଷ୍ଟ୍ରେଟ କେ.କେ ମିଶ୍ର, ଜିଲ୍ଲା ପଞ୍ଚାୟତ ରାଜ ଅଧିକାରୀ ଆରସି ତ୍ରିପାଠୀ, ମୁଖ୍ୟ ଶିକ୍ଷା ଅଧିକାରୀ ଡକ୍ଟର ଆନନ୍ଦ ଭରଦ୍ୱାଜ, ବିଜେପି ନେତା ଓମପ୍ରକାଶ ଜାମଦଗ୍ନି, ଜିଲ୍ଲା କ୍ରୀଡ଼ା ଅଧିକାରୀ ସୁନୀଲ ଡୋଭାଲ, ବିଜେପି ନେତା ମାଷ୍ଟର ସତ୍ୟପାଲ ଏବଂ ରାଜକୁମାର କାସନା ଉପସ୍ଥିତ ଥିଲେ।
ମହିଳା ହକି ଦଳର ପ୍ରଦର୍ଶନ ଅଲିମ୍ପିକ୍ସ ଇତିହାସରେ ସର୍ବଶ୍ରେଷ୍ଠ ପ୍ରଦର୍ଶନ କରିଛି। ଏହା ପୂର୍ବରୁ ରାଜ୍ୟ ସରକାର ମଧ୍ୟ ବନ୍ଦନା କାଟାରିଆଙ୍କୁ ତିଲୁ ରାଉତଲି ପୁରସ୍କାର ପ୍ରଦାନ କରିବାକୁ ଘୋଷଣା କରିଥିଲେ। ଏହା ବ୍ୟତୀତ ଅଲିମ୍ପିକ ଗେମ୍ସରେ ଉଲ୍ଲେଖନୀୟ ପ୍ରଦର୍ଶନ ପାଇଁ ଉତ୍ତରାଖଣ୍ଡ ସରକାର ବନ୍ଦନାଙ୍କୁ ୨୫ ଲକ୍ଷ ଟଙ୍କା ପୁରସ୍କାର ଘୋଷଣା କରିଛନ୍ତି।
ଅଲିମ୍ପିକ୍ସରେ ବନ୍ଦନା କାଟାରିଆଙ୍କ ପ୍ରଦର୍ଶନ ପରେ ରାଜ୍ୟର ପୁଷ୍କର ଧାମି ସରକାର ମଧ୍ୟ କ୍ରୀଡ଼ା ନୀତି କାର୍ଯ୍ୟକାରୀ କରିବାକୁ ଯୋଜନା କରିଛନ୍ତି। ବନ୍ଦନା କଟରିଆ ରାଷ୍ଟ୍ରପତି ରାମ ନାଥ କୋବିନ୍ଦ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବେ। ସ୍ୱାଧୀନତା ଦିବସରେ ଲାଲ୍ କିଲ୍ଲାରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମରେ ସେ ଭାରତୀୟ ଦଳ ସହିତ ମଧ୍ୟ ଅଂଶଗ୍ରହଣ କରିବେ।
