ଭୁବନେଶ୍ୱର (ସତ୍ୟପାଠ ବ୍ୟୁରୋ): ୨୦୨୪ ଲୋକସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି (ବିଜେପି) ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ ପାଇବା ପରେ ରାଜଧାନୀ ଦିଲ୍ଲୀର ଚାନ୍ଦନୀ ଚୌକ ଲୋକସଭା ଆସନର ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ଡାକ୍ତର ହର୍ଷବର୍ଦ୍ଧନ ରାଜନୀତିରୁ ଅବସର ଘୋଷଣା କରିଛନ୍ତି। ଏହାପୂର୍ବରୁ ପୂର୍ବ ଦିଲ୍ଲୀର ବିଜେପି ସାଂସଦ ଗୌତମ ଗମ୍ଭୀର ଏବଂ ହାଜରିବାଗରୁ ସାଂସଦ ଜୟନ୍ତ ସିହ୍ନା ବିଜେପିର ପ୍ରଥମ ତାଲିକା ବାହାରିବା ପୂର୍ବରୁ ମଧ୍ୟ ସକ୍ରିୟ ରାଜନୀତିରୁ ଓହରିଯିବାକୁ ବିଜେପି ରାଷ୍ଟ୍ରୀୟ ଅଧକ୍ଷଙ୍କୁ ଅନୁରୋଧ କରିଥିଲେ। ଆଉ ପ୍ରାର୍ଥୀ ତାଲିକା ଘୋଷଣା ହେବାପରେ ହର୍ଷବର୍ଦ୍ଧନ ମଧ୍ୟ ସକ୍ରିୟ ରାଜନୀତିରୁ ନିଜକୁ ଦୂରେଇ ରଖିବାକୁ ନିଷ୍ପତ୍ତି ନେଇଛନ୍ତି।
ରବିବାର ଦିନ ସୋସିଆଲ ମିଡିଆ ଏକ୍ସରେ ପୋଷ୍ଟ କରି ହର୍ଷବର୍ଦ୍ଧନ ଏହି ସୂଚନା ଦେଇଛନ୍ତି। ତିରିଶ ବର୍ଷରୁ ଅଧିକ ସମୟ ଧରି ତାଙ୍କର ଉଲ୍ଲେଖନୀୟ ରାଜନୈତିକ କ୍ୟାରିୟରରେ ହର୍ଷବର୍ଦ୍ଧନ ପାଞ୍ଚଥର ବିଧାନସଭା ଏବଂ ଦୁଇ ଥର ସଂସଦୀୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ବୃହତ ବ୍ୟବଧାନରେ ଜିତିଥିଲେ। ସେ ଦଳ ସଂଗଠନ, ରାଜ୍ୟ ତଥା କେନ୍ଦ୍ର ସରକାରଙ୍କର ଅନେକ ସମ୍ମାନଜନକ ପଦବୀରେ ଅବସ୍ଥାପିତ ହୋଇଥିଲେ। ରାଜନୀତିରୁ ସନ୍ୟାସ ଘୋଷଣା କରି ସେ କହିଛନ୍ତି, ବର୍ତ୍ତମାନ ମୁଁ ମୋର କାମକୁ ଫେରିବାକୁ ଚାହୁଁଛି। କୃଷ୍ଣା ନଗରରେ ଥିବା ମୋର ଇଏନଟି କ୍ଲିନିକ୍ ମଧ୍ୟ ମୋ ପ୍ରତ୍ୟାବର୍ତ୍ତନକୁ ଅପେକ୍ଷା କରିଛି।
ସେ ଲେଖିଛନ୍ତି ପଚାଶ ବର୍ଷ ପୂର୍ବେ, ଯେତେବେଳେ ମୁଁ କାନପୁରର ଜିଏସଭିଏମ ମେଡିକାଲ କଲେଜରେ ଏମବିବିଏସରେ ଆଡମିଶନ କଲି, ସେତେବେଳେ ଗରିବ ଏବଂ ଅସହାୟ ଲୋକଙ୍କୁ ସାହାଯ୍ୟ କରିବା ତଥା ମାନବଜାତି ପାଇଁ ସେବା ମୋର ଉଦ୍ଦେଶ୍ୟ ଥିଲା। ମୁଁ ତତ୍କାଳୀନ ଆରଏସଏସ ନେତୃତ୍ୱଙ୍କ ଅନୁରୋଧ କ୍ରମେ ନିର୍ବାଚନ କ୍ଷେତ୍ରକୁ ଆସିଥିଲି। ସେ ମୋତେ ଏନେଇ ରାଜି କରିଥିଲେ। ମୋ ପାଇଁ ରାଜନୀତିର ଅର୍ଥ ହେଉଛି ଆମର ତିନୋଟି ମୁଖ୍ୟ ଶତ୍ରୁ ଦାରିଦ୍ର୍ୟ, ରୋଗ ଏବଂ ଅଜ୍ଞାନତା ସହିତ ଲଢ଼ିବାର ଏକ ସୁଯୋଗ । ସେ ଆହୁରି ଲେଖିଛନ୍ତି, ‘ମୁଁ ମୋର ସମସ୍ତ ଦଳର କର୍ମୀ, ମୋର ପ୍ରଶଂସକ ଏବଂ ସାଧାରଣ ନାଗରିକ, ସମର୍ଥକ ତଥା ମୋର ଦଳର ନେତାମାନଙ୍କୁ ଧନ୍ୟବାଦ ଦେବାକୁ ଚାହେଁ। ତିନି ଦଶନ୍ଧିରୁ ଅଧିକ ସମୟର ଏହି ଉଲ୍ଲେଖନୀୟ ଯାତ୍ରାରେ ସମସ୍ତେ ସହଯୋଗ କରିଛନ୍ତି ।
ସୂଚନାଯୋଗ୍ୟ ଯେ, ବିଜେପି ଦ୍ୱାରା ପ୍ରକାଶିତ ପ୍ରଥମ ତାଲିକାରେ ଦିଲ୍ଲୀର ୫ ଆସନ ପାଇଁ ପ୍ରାର୍ଥୀ ଘୋଷଣା କରାଯାଇଛି। ଏଥିରେ ଚାନ୍ଦନୀ ଚୌକ, ନୂଆଦିଲ୍ଲୀ, ଉତ୍ତର-ପୂର୍ବ ଦିଲ୍ଲୀ, ଦକ୍ଷିଣ ଦିଲ୍ଲୀ ଏବଂ ପଶ୍ଚିମ ଦିଲ୍ଲୀ ସଂସଦୀୟ ଆସନ ଅନ୍ତର୍ଭୁକ୍ତ। ଉତ୍ତର-ପୂର୍ବ ଦିଲ୍ଲୀର ସାଂସଦ ମନୋଜ ତିୱାରୀଙ୍କୁ ଛାଡି ବିଜେପି ସମସ୍ତ ସିଟିଂ ସାଂସଦଙ୍କ ଟିକେଟ୍ କାଟିଛି।
ଚାନ୍ଦନୀ ଚୌକର ବ୍ୟବସାୟୀ ନେତା ପ୍ରବୀଣ ଖଣ୍ଡେଲୱାଲ, ନୂଆଦିଲ୍ଲୀରୁ ପୂର୍ବତନ ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜଙ୍କ ଝିଅ ବାଂସୁରୀ ସ୍ୱରାଜ, ଦକ୍ଷିଣ ଦିଲ୍ଲୀରେ ବିଧାନସଭାରେ ବିରୋଧୀଦଳର ନେତା ରାମଭୀର ସିଂ ବିଧୁଡି ଏବଂ ପଶ୍ଚିମ ଦିଲ୍ଲୀର କାଉନସିଲର ତଥା ଦକ୍ଷିଣ ଦିଲ୍ଲୀ ମ୍ୟୁନିସିପାଲିଟି କର୍ପୋରେସନର ମେୟର କମଲଜିତ ସେହରାୱତଙ୍କ ଉପରେ ବିଜେପି ଭରସା କରି ଟିକେଟ ଦେଇଛି।
