ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଗୁଜୁରାଟ ବିଧାନସଭା ନିର୍ବାଚନ ପୂର୍ବରୁ ବଡ ଅଭିଯୋଗ ଆଣିଛି କଂଗ୍ରେସ | ଗୁଜୁରାଟର ବରିଷ୍ଠ କଂଗ୍ରେସ ନେତା ତଥା ବିଧାୟକ ଦଳ ମୁଖ୍ୟ ସଚେତକ ସିଜେ ଚାଭଡା ଅଭିଯୋଗ କରିଛନ୍ତି ଯେ ରାଜ୍ୟର ନିର୍ବାଚନ ତାଲିକାରେ ଅତି କମରେ ୧୮ ରୁ ୨୦ ଲକ୍ଷ ନକଲି ଭୋଟର ଅଛନ୍ତି। ଏହି ନକଲ ଭୋଟରମାନଙ୍କୁ ନିର୍ବାଚନରେ ଅପବ୍ୟବହାର କରାଯାଏ । ଚାଭଡା ଆହୁରି କହିଛନ୍ତି ଯେ କେବଳ ମେହସାନା ନିର୍ବାଚନମଣ୍ଡଳୀରେ ୧୧,୦୦୦ ନକଲି ଭୋଟର ଅଛନ୍ତି ଓ ପ୍ରତ୍ୟେକ ନିର୍ବାଚନମଣ୍ଡଳୀରେ ଏପରି ନକଲ ଭୋଟର ଅଛନ୍ତି। ସେ କହିଛନ୍ତି ନକଲି ଭୋଟରଙ୍କୁ ଚିହ୍ନିବା କଷ୍ଟକର ବ୍ୟାପାର ନୁହେଁ | ଏପରି ନକଲି ଭୋଟରମାନେ କିପରି ବ୍ଲକ ସ୍ତରୀୟ ଅଧିକାରୀଙ୍କ ନଜରକୁ ଆସିନଥାନ୍ତି ବୋଲି ସେ ପ୍ରଶ୍ନ କରିଛନ୍ତି |
କଂଗ୍ରେସ ନେତା ଅଭିଯୋଗ କରିଛନ୍ତି ଯେ ଯଦି ଏହି ନକଲି ଭୋଟରଙ୍କୁ ଭୋଟର ତାଲିକାରୁ ନ ହଟାଯାଏ, ତେବେ ଏହା ୨୦୧୭ ବିଧାନସଭା ନିର୍ବାଚନ ଫଳାଫଳ ଭଳି ଏଥରର ନିର୍ବାଚନ ଫଳାଫଳ ଉପରେ ମଧ୍ୟ ପ୍ରଭାବ ପଡିପାରେ। ସେ କହିଛନ୍ତି ଯେ ଗତ ନିର୍ବାଚନରେ କଂଗ୍ରେସ ୨୦ଟି ସିଟରେ ୧୦୦୦ ରୁ କମ୍ ଭୋଟ୍ ବ୍ୟବଧାନରେ ହାରିଥିବାବେଳେ ୩୫ ରୁ ୪୦ଟି ଆସନରେ ୧୦୦୦ ରୁ ୨୦୦୦ ଭୋଟ ବ୍ୟବଧାନରେ ପରାଜୟର ସମ୍ମୁଖୀନ ହୋଇଥିଲା | ଯଦି ପ୍ରତ୍ୟେକ ନିର୍ବାଚନମଣ୍ଡଳୀରେ ୪୦୦୦ ରୁ ୧୦୦୦୦ ନକଲି ଭୋଟ୍ ଅଛି, ତେବେ ନିର୍ବାଚନ ଫଳାଫଳ କିପରି ପ୍ରଭାବିତ ହେବ ତାହା କଳ୍ପନା କରନ୍ତୁ। ସୂଚନାଯୋଗ୍ୟ ଯେ ଚଳିତ ବର୍ଷ ଶେଷଆଡକୁ ଗୁଜୁରାଟରେ ବିଧାନସଭା ନିର୍ବାଚନ ହୋଇପାରେ |
