ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଆସନ୍ତା ୭ତାରିଖରୁ କଂଗ୍ରେସ ଆରମ୍ଭ କରୁଛି ‘ଭାରତ ଯୋଡ଼ୋ ଯାତ୍ରା’। ଏହି ଯାତ୍ରାରେ ଦଳର ପୂର୍ବତନ ଅଧ୍ୟକ୍ଷ ତଥା ସାଂସଦ ରାହୁଲ ଗାନ୍ଧୀଙ୍କ ସମେତ କଂଗ୍ରେସର ଅନ୍ୟ ନେତୃବୃନ୍ଦ ପାଦରେ ଚାଲି ଚାଲି ୧୨ ଟି ରାଜ୍ୟ ଓ ୨ କେନ୍ଦ୍ର ଶାସିତ ଅଞ୍ଚଳର ୩୫୭୧ କି.ମିରୁ ଅଧିକ ପଥ ଅତିକ୍ରମ କରିବେ। ଏହି ଯାତ୍ରା ୧୫୦ ଦିନ ଧରି ଚାଲିବ ବୋଲି ଧାର୍ଯ୍ୟ କରାଯାଇଛି। କଂଗ୍ରେସ ପକ୍ଷରୁ କୁହାଯାଇଛି ଯେ ଦେଶର ଭୁଶୁଡ଼ି ପଡ଼ିଥିବା ସାମାଜିକ, ଆର୍ଥିକ, ଗଣତାନ୍ତ୍ରିକ ତଥା ସାମ୍ବିଧାନିକ ବ୍ୟବସ୍ଥାର ସୁରକ୍ଷା ଏବେ ଅତ୍ୟନ୍ତ ଆବଶ୍ୟକ ହୋଇ ପଡ଼ିଛି। ତେବେ କଂଗ୍ରେସର ବରିଷ୍ଠ ନେତା ଶଶି ଥରୁର ମଙ୍ଗଳବାର ଏହି ଯାତ୍ରା ନେଇ କହିଛନ୍ତି ଯେ ‘ଭାରତ ଯୋଡ ଯାତ୍ରା’ ମାଧ୍ୟମରେ ‘କଂଗ୍ରେସ ଯୋଡ’ର ଲକ୍ଷ୍ୟ ହାସଲ କରାଯାଇପାରିବ।
ଥରୁର ଆହୁରି କହିଛନ୍ତି ଯେ, ଏହି ପଦଯାତ୍ରା ଏକ ବାର୍ତ୍ତା ଦେବ ଯେ କଂଗ୍ରେସ ହେଉଛି ଏକମାତ୍ର ଦଳ ଯାହା ଭାରତକୁ ଏକଜୁଟ କରିପାରିବ ଏବଂ ଯଦି ଏହି ବାର୍ତ୍ତା ଜନସାଧାରଣଙ୍କ ନିକଟରେ ପହଞ୍ଚିବ ତେବେ ଏହା ଦଳକୁ ପୁନର୍ଜୀବିତ କରିବ। ଉଲ୍ଲେଖ ଥାଉ କି କଂଗ୍ରେସରୁ ଇସ୍ତଫା ଦେଇଥିବା ବରିଷ୍ଠ ନେତା ଗୁଲାମ ନବୀ ଆଜାଦ ଇସ୍ତଫା ପତ୍ରରେ ଲେଖିଥିଲେ ଯେ ‘ଭାରତ ଯୋଡୋ’ ପରିବର୍ତ୍ତେ ‘କଂଗ୍ରେସ ଯୋଡୋ’ ଉପରେ ଧ୍ୟାନ ଦେବା ଉଚିତ ।ଆଉ ଏହାକୁ ନେଇ ଶଶି ଥରୁର କହିଛନ୍ତି ଯେ ଗୁଲାମ ନବୀ ସାହେବ ଜଣେ ସମ୍ମାନିତ ଏବଂ ବରିଷ୍ଠ ନେତା ଏବଂ ମୁଁ ତାଙ୍କ ମନ୍ତବ୍ୟ ଉପରେ କିଛି କହିବି ନାହିଁ | ଆମେ ଲୋକଙ୍କ ସମସ୍ୟା ସହ ଜଡିତ ପ୍ରସଙ୍ଗ ପାଇଁ ସଂଗ୍ରାମ କରୁଛୁ, ଭାରତ ଯୋଡ ଯାତ୍ରା ଆମ ମୂଲ୍ୟବୋଧକୁ ନେଇ ସାରା ଦେଶରେ କଂଗ୍ରେସ ସହିତ ପୁରୁଷ ଓ ମହିଳାମାନଙ୍କୁ ଏକତ୍ର କରିପାରିବ।
