![](https://www.satyapatha.com/wp-content/uploads/2022/04/images-2022-04-16T141927.564.jpeg)
ନୂଆଦିଲ୍ଲୀ: କରୋନା କୁ ମାତ ଦେବା ପାଇଁ ଜୋର ଧରିଛି ଟୀକାକରଣ | କରୋନା କବଳରୁ ରକ୍ଷା ପାଇବା ପାଇଁ ସଂଜୀବନୀ ପାଲଟିଛି ଟୀକା | କେନ୍ଦ୍ର ସରକାର ଟୀକାକରଣ ବ୍ୟବସ୍ଥାକୁ ଜୋର କରିଛନ୍ତି | କିପରି ସମସ୍ତେ ଟୀକା ନେବେ ସେନେଇ ସଚେତନ କରାଉଛନ୍ତି | ତେବେ ଏହାରି ମଧ୍ୟରେ ଏବେ ମଧ୍ୟ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ୨୦.୬୦ କୋଟିରୁ ଊର୍ଦ୍ଧ୍ବ ବଳକା ତଥା ଅବ୍ୟବହୃତ କରୋନାଭାଇରସ୍ ଟିକା ଉପଲବ୍ଧ ବୋଲି ଆଜି କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ସୂଚନା ଦେଇଛି।
ମନ୍ତ୍ରାଳୟ କହିବା ଅନୁସାରେ, କେନ୍ଦ୍ର ସରକାରଙ୍କ ‘ଫ୍ରି ଅଫ୍ କଷ୍ଟ୍ ଚାନେଲ୍’ ଏବଂ ‘ଡାଇରେକ୍ଟ୍ ଷ୍ଟେଟ୍ ପ୍ରୋକ୍ୟୋର୍ମେଣ୍ଟ୍ କାଟେଗୋରି’ ଜରିଆରେ ଏଯାବତ୍ ୧୯୨.୨୭ କୋଟି (୧,୯୨,୨୭,୨୩,୬୨୫) ଡୋଜ୍ ଟିକା ରାଜ୍ୟ/କେନ୍ଦ୍ରଶାସିତ ଅଞ୍ଚଳକୁ ଯୋଗାଇ ଦିଆଯାଇଛି। ସେଥିରୁ ବ୍ୟବହାର ହେବା ପାଇଁ ଆହୁରି ୨୦.୬୦ କୋଟି (୨୦,୬୦,୩୭,୩୩୬) ଡୋଜ୍ କରୋନାଭାଇରସ୍ ଟିକା ବଳକା ଏବଂ ଅବ୍ୟବହୃତ ହୋଇ ରହିଛି ବୋଲି ମନ୍ତ୍ରାଳୟ କହିଛି।
ମନ୍ତ୍ରାଳୟ ଆହୁରି ମଧ୍ୟ କହିଛି ଯେ, କୋଭିଡ୍-୧୯ ଟିକାକରଣ ଅଭିଯାନର ସାର୍ବଜନୀନକରଣର ନୂତନ ପର୍ଯ୍ୟାୟରେ କେନ୍ଦ୍ର ସରକାର ଦେଶର ଟିକା ନିର୍ମାତାଙ୍କ ଠାରୁ ୭୫% ଟିକା କିଣି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ମାଗଣାରେ ଯୋଗାଇ ଦେବେ।
ଦେଶବ୍ୟାପୀ କୋଭିଡ୍-୧୯ ଟିକାକରଣର ବେଗ ଓ ପରିସର ବୃଦ୍ଧି ପାଇଁ କେନ୍ଦ୍ର ସରକାର ପ୍ରତିବଦ୍ଧ ବୋଲି ମନ୍ତ୍ରାଳୟ କହିଛି।
ସୂଚନାଯୋଗ୍ୟ, ୨୦୨୧ ଜାନୁଆରି ୧୬ ତାରିଖରୁ ଦେଶବ୍ୟାପୀ କୋଭିଡ୍-୧୯ ଟିକାକରଣ ଅଭିଯାନ ଆରମ୍ଭ ହୋଇଥିଲା।