(ସତ୍ଯପାଠ ବ୍ୟୁରୋ) ଭୁବନେଶ୍ୱର : ବିହାର ରାଜନୀତିରେ ବଦଳୁଛି ରାଜନୈତିକ ସମୀକରଣ। ଏଲଜେପିର ରାଷ୍ଟ୍ରୀୟ ଅଧ୍ୟକ୍ଷ ପଦକୁ ନେଇ ଦାଦା ପୁତୁରା ଲଢେଇ ମଧ୍ୟରେ ଦାଦା ବିଜି ମାରି ନେଇଛନ୍ତି। ତାଙ୍କୁ କେନ୍ଦ୍ର ମନ୍ତ୍ରୀମଣ୍ଡଳରେ ସାମିଲ କରାଯିବା ପରେ ବିହାର ରାଜନୀତିରେ ଚର୍ଚ୍ଚା ଜୋର ଧରିଛି। ନିଜକୁ ଏଲଜେପିର ମୁଖିଆ କହୁଥିବା ଚିରାଗ ପାଶୱାନ ଏବେ କୋର୍ଟରୁ ମଧ୍ୟ ନିରାଶ ହୋଇଛନ୍ତି। ଏହା ପରେ ଚିରାଗ ପାସୱାନ ଶନିବାର ଦିନ ରାଷ୍ଟ୍ରୀୟ ଜନତା ଦଳ (ଆରଜେଡି) ଜାତୀୟ ସାଧାରଣ ସମ୍ପାଦକ ଶ୍ୟାମ ରାଜକଙ୍କୁ ଭେଟିଛନ୍ତି।
ଏହି ବୈଠକ ପରେ ରାଜନୈତିକ କଳ୍ପନାଜଳ୍ପନା ଆରମ୍ଭ ହୋଇଛି। ଦୁଇ ନେତାଙ୍କ ମଧ୍ୟରେ ସାକ୍ଷାତ ଏମିତି ଏକ ସମୟରେ ହୋଇଛି ଯେତେବେଳେ ଚିରାଗଙ୍କ ଦାଦା ପାଶୁପତି ପରାସଙ୍କୁ କେନ୍ଦ୍ରରେ ରାଜ୍ୟ ମନ୍ତ୍ରୀ କରାଯାଇଛି। ଏହାପରେ ଆରଜେଡି ନେତା ତେଜଶ୍ୱୀ ଯାଦବ ମଧ୍ୟ ଚିରାଗ ପାଶୱାନଙ୍କୁ ସହଯୋଗର ହାତ ବଢାଇଛନ୍ତି। ଏବେ ଚିରାଗ ଆରଜେଡି ସହିତ ଯିବେ କି ନାହିଁ ତାକୁ ନେଇ କଳ୍ପନାଜଳ୍ପନା ଚାଲିଛି।
ନ୍ୟୁଜ୍ ଏଜେନ୍ସି ANI ଅନୁଯାୟୀ, ରାଜକ କହିଛନ୍ତି, ‘ ଚିରାଗଙ୍କ ସହ ଏହା ଏକ ସୌଜନ୍ୟମୂଳକ ବୈଠକ ଥିଲା। ମୁଁ ଚିରାଗ ପାସୱାନଙ୍କ ସମେତ ପାସୱାନ ପରିବାରକୁ ଭେଟିବାକୁ ଯାଇଥିଲି । ଏହି ବୈଠକକୁ ଚର୍ଚ୍ଚା ଜୋର ଧରିଛି କାରଣ ଶ୍ୟାମ ରାଜକ ଚିରାଗଙ୍କୁ ଭେଟିବାର ଗୋଟିଏ ଦିନ ପୂର୍ବରୁ ଅର୍ଥାତ୍ ଶୁକ୍ରବାର ଦିନ ଚିରାଗ ଆରଜେଡି ସୁପ୍ରିମୋ ଲାଲୁ ଯାଦବଙ୍କୁ ଭେଟିଥିଲେ। କୁହାଯାଉଛି ଯେ ରାଜକ ଆରଜେଡି ସୁପ୍ରିମୋଙ୍କ ବାର୍ତ୍ତା ନେଇ ଚିରାଗଙ୍କୁ ଭେଟିବାକୁ ଯାଇଥିଲେ।
ତେବେ ଏହି ସାକ୍ଷାତକାର ପରେ ସେ କହିଛନ୍ତି ଯେ ଯଦି ଚିରାଗ ଆରଜେଡିରେ ଯୋଗ ଦିଅନ୍ତି ତେବେ ତାଙ୍କୁ ସ୍ୱାଗତ କରାଯିବ । ଏଥିପାଇଁ ରାଜକ କହିଛନ୍ତି, ‘ଲୋହିଆ ଏବଂ ଆମ୍ବେଦକରଙ୍କ ଆଦର୍ଶକୁ ଆଗକୁ ନେବାକୁ ଚାହୁଁଥିବା ସମସ୍ତଙ୍କୁ ସ୍ୱାଗତ କରାଯାଇଛି। ସେ ଚିରାଗ ପାସୱାନ୍ ହୁଅନ୍ତୁ କିମ୍ବା ଅନ୍ୟ କେହି ।
RJD ସୂତ୍ରରୁ ମିଳିଥିବା ସୂଚନା ମୁତାବକ ଶନିବାର ସନ୍ଧ୍ୟାରେ ଚିରାଗ ପାସୱାନ୍ RJD ସୁପ୍ରିମୋ ଲାଲୁ ଯାଦବଙ୍କ ସହ 15 ମିନିଟରୁ ଅଧିକ ସମୟ ଧରି ଫୋନ୍ ମାଧ୍ୟମରେ କଥା ହୋଇଥିଲେ। ଲାଲୁ ଯାଦବଙ୍କ ସହ କଥା ହେବା ପରେ ଚିରାଗ ତେଜସ୍ୱୀ ଯାଦବଙ୍କ ସହ କଥା ହୋଇଥିଲେ। ସୂତ୍ରରୁ ପ୍ରକାଶ ଯେ ଦୁଇ ନେତା ବିହାରରେ ଭବିଷ୍ୟତର ରାଜନୈତିକ ମେଣ୍ଟ ଉପରେ ଆଲୋଚନା କରିଥିଲେ।
ଗତ ମାସରେ, ତେଜସ୍ୱୀ ଯାଦବ ଚିରାଗଙ୍କୁ ଆରଜେଡିରେ ଯୋଗଦେବାକୁ ନିମନ୍ତ୍ରଣ କରିଥିଲେ। ତେବେ ଚିରାଗ ତାଙ୍କ ପ୍ରସ୍ତାବ ଉପରେ କିଛି ପ୍ରତିକ୍ରିୟା ରଖି ନାହାଁନ୍ତି। ସେପଟେ ଶୁକ୍ରବାର ଦିନ ପାଶୁପତି ପରାସ ଦାବି କରିଛନ୍ତି ଯେ ସେ ଏଲଜେପିର ପ୍ରକୃତ ଉତ୍ତରାଧିକାରୀ। ଗତ ମାସରେ, ପାଶୁପତି ପରାସ ଏବଂ ଅନ୍ୟ ଚାରିଜଣ ସାଂସଦ ଲୋକସଭା ବାଚସ୍ପତି ଓମ ବିର୍ଲାଙ୍କୁ ଚିଠି ଲେଖି ଲୋକସଭାରେ ଦଳର ନେତା ପଦରୁ ଚିରାଗଙ୍କୁ ହଟାଇବାକୁ ଦାବି କରିଥିଲେ।
