ଶ୍ରୀନଗର: ଜମ୍ମୁ କାଶ୍ମୀରର ଶ୍ରୀନଗରରେ ଆତଙ୍କ ଖେଳାଇଲେ ବୁଲା କୁକୁର | ଫଳରେ ବୁଲା କୁକୁରଙ୍କ ଆକ୍ରମଣରେ ୧୭ ଜଣ ପର୍ଯ୍ୟଟକଙ୍କ ସହ ମୋଟ ୩୯ ଜଣ ଆହତ ହୋଇଛନ୍ତି । ଗତକାଲି ସନ୍ଧ୍ୟା ସମୟରେ ଶ୍ରୀନଗର ଡାଲଗେଟ ଅଞ୍ଚଳରେ କିଛି ବୁଲା କୁକୁର ଗୋଷ୍ଠୀ ପରସ୍ପରକୁ ଆକ୍ରମଣ କରିଥିଲେ । ଏହି ସମୟରେ ସେଠାରେ ଥିବା ସ୍ଥାନୀୟ ଲୋକଙ୍କୁ କୁକୁର ଗୋଷ୍ଠୀ ଆକ୍ରମଣ କରିଥିଲେ । ଫଳରେ ୧୭ ଜଣ ପର୍ଯ୍ୟଟକ ଏବଂ ୨୨ ଜଣ ସ୍ଥାନୀୟ ଲୋକ ଆହତ ହୋଇଥିଲେ । ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ସ୍ଥାନୀୟ ସୁତ୍ରରୁ ଜଣାପଡିଛି ।
ଏନେଇ ଶ୍ରୀନଗରର ଏସଏମଏଚଏସ ହସ୍ପିଟାଲର ମେଡିକାଲ ଅଧୀକ୍ଷକ କାଲଜିତ ସିଂ କହିଛନ୍ତି ଯେ ସମସ୍ତ ଆହତଙ୍କ ଏବେ ଚିକିତ୍ସା ଜାରି ରହିଛି ।
ଡାଲ ହ୍ରଦ କୂଳରେ ଥିବା ଡାଲଗେଟ ଅଞ୍ଚଳରେ ପର୍ଯ୍ୟଟକଙ୍କ ସବୁଦିନ ଭିଡ ଲାଗିରହିଥାଏ । ତେଣୁ ଏଠାରେ ପର୍ଯ୍ୟକଟକଙ୍କ ସୁରକ୍ଷା ପାଇଁ କର୍ତ୍ତୃପକ୍ଷଙ୍କୁ ନିବେଦନ କରିଛନ୍ତି ସ୍ଥାନୀୟ ଲୋକେ । ଏଥିସହ ବୁଲା କୁକୁରଙ୍କୁ ଧରି ଅନ୍ୟତ୍ର ଛାଡିବା ପାଇଁ ନିବେଦନ କରିଛନ୍ତି |
