![](https://www.satyapatha.com/wp-content/uploads/2022/03/aca-1-716x458.jpg)
ଭୁବନେଶ୍ୱର(ସତ୍ୟପାଠ ବ୍ୟୁରୋ): ରିଲାଏନ୍ସ ଗ୍ରୁପର ଚେୟାରମ୍ୟାନ ଅନିଲ ଅମ୍ବାନୀ ରିଲାଏନ୍ସ ପାଓ୍ୱାର ଓ ରିଲାଏନ୍ସ ଇନଫ୍ରାଷ୍ଟ୍ରକଚର ନିର୍ଦ୍ଦେଶକ ପଦରୁ ଇସ୍ତଫା ଦେଇଛନ୍ତି । ପୂର୍ବରୁ ସେବି ନିର୍ଦ୍ଦେଶରେ ତାଙ୍କୁ କୌଣସି ତାଲିକାଭୂକ୍ତ କମ୍ପାନୀରେ ସାମିଲ କରାଯାଇ ପାରିବ ନାହିଁ ବୋଲି କୁହାଯାଇଥିଲା । ଏହାପରେ ଅମ୍ବାନୀ ନିଜ ପଦରୁ ଇସ୍ତଫା ଦେଇଛନ୍ତି । ଏ ଖବର ସାମ୍ନାକୁ ଆସିବା ପରେ ସାରା ଦେଶରେ ଏହା ଚର୍ଚ୍ଚାର ବିଷୟ ପାଲଟିଛି । ସେପଟେ ଲାଏନ୍ସ ପାଓ୍ୱାର ବିଏସଇ ଫାଇଲିଂରେ କହିଛନ୍ତି ଯେ, ଅନିଲ ଅମ୍ବାନୀ ଅଣ କାର୍ଯ୍ୟକାରୀ ନିର୍ଦ୍ଦେଶକ, ସେବିର ନିୟମ ମାନି ରିଲାଏନ୍ସ ପାଓ୍ୱାର ବୋର୍ଡରୁ ହଟିଛନ୍ତି ।
ସେହିପରି ରିଲାଏନ୍ସ ଇନଫ୍ରାଷ୍ଟ୍ରକଚର୍ ମଧ୍ୟ ସମାନ କଥା କହିଛି । ସେହିପରି ଉଭୟ କମ୍ପାନୀ କହିଛନ୍ତି ଯେ, ଆର ପାଓ୍ୱାର ଓ ଆର୍ ଇନଫ୍ରାର ନିର୍ଦ୍ଦେଶକ ମଣ୍ଡଳୀ ଶୁକ୍ରବାର ରାହୁଲ ସରୀନଙ୍କୁ ଆସନ୍ତା ୫ ବର୍ଷ ପାଇଁ ସ୍ୱତନ୍ତ୍ର ନିର୍ଦ୍ଦେଶକ ପଦ ପ୍ରଦାନ କରିଛନ୍ତି । ତେବେ ଏହାକୁ ବୋର୍ଡର ସଦସ୍ୟମାନେ ମଞ୍ଜୁରୀ ଦେବା ବାକି ରହିଛି । ୭୨ ବର୍ଷୀୟ ରାହୁଲ ପ୍ରଶାସନିକ ସେବାରେ ଥିଲେ । ସେ ଦୀର୍ଘ ୩୫ ବର୍ଷ ଧରି ଲୋକଙ୍କ ସେବା କରିଛନ୍ତି । ସେ କେନ୍ଦ୍ର ସରକାରଙ୍କ ସଚିବ ରହି ଅବସର ଗ୍ରହଣ କରିଥିଲେ ।