ଭୁବନେଶ୍ୱର(ସତ୍ୟପାଠ ବ୍ୟୁରୋ): ମହାରାଷ୍ଟ୍ର ରାଜନୀତି ଉପରେ ବର୍ତ୍ତମାନ ସାରା ଦେଶର ନଜର ରହିଛି । କାହିଁକିନା ସରକାରଙ୍କ ମନ୍ତ୍ରୀ ଏକନାଥ ସିନ୍ଦେ ୩୦ ରୁ ଅଧିକ ବିଧାୟକଙ୍କ ସହ ଗୁଜୁରାଟର ସୁରଟ ଅଭିମୁଖେ ଯାତ୍ରା କରିଛନ୍ତି। ଏହା ପରେ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ତାଙ୍କ ବିଧାୟକଙ୍କ ସହ ଏକ ବୈଠକ କରିଥିଲେ ଏବଂ ଏନସିପି ମୁଖ୍ୟ ଶରଦ ପାୱାରଙ୍କ ସହ ମଧ୍ୟ କଥା ହୋଇଥିଲେ। ସେପଟେ ଏନସିପି ନେତା ଶରଦ ପାୱାର ଏହି ବିଦ୍ରୋହ ବିଷୟରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ପୂର୍ବରୁ ହିଁ ଅବଗତ କରାଇଥିବାର ସୂଚନା ମିଳିଛି । ଏକନାଥ ସିନ୍ଦେଙ୍କ ବିଦ୍ରୋହର ଦୁଇ ଦିନ ପୂର୍ବରୁ, ପୋୱାଇର ରେଭେନ୍ସା ହୋଟେଲରେ ଶିବସେନାର କ୍ୟାବିନେଟ ମନ୍ତ୍ରୀ ତଥା ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ପୁଅ ଆଦିତ୍ୟ ଠାକରେ ଏବଂ ସାଂସଦ ସଞ୍ଜୟ ରାଉତଙ୍କ ସହ ସିନ୍ଦେଙ୍କ ଯୁକ୍ତିତର୍କ ହୋଇଥିଲା । ଗତ କିଛି ମାସ ଧରି ରାଜ୍ୟରେ ଯାହା ଚାଲିଥିଲା ତାକୁ ନେଇ ସିନ୍ଦେ ଅସନ୍ତୁଷ୍ଟ ଥିଲେ । ଏନେଇ ସେ ମୁଖ୍ୟମନ୍ତ୍ରୀଙ୍କୁ ମଧ୍ୟ ଅବଗତ କରାଇଥିଲେ ।
ତେବେ ଦୁଇ ଦିନ ପୂର୍ବେ ରେଭେନ୍ସା ହୋଟେଲରେ ବିଧାନ ପରିଷଦ ନିର୍ବାଚନରେ ଭୋଟ୍ କିପରି ବ୍ୟବହାର କରାଯିବ ସେନେଇ ଆଲୋଚନା ଚାଲିଥିବାବେଳେ ସଞ୍ଜୟ ରାଉତ ଏବଂ ଆଦିତ୍ୟ ଠାକରେଙ୍କ ସହ ସିନ୍ଦେଙ୍କ ମତଭେଦ ହୋଇଥିଲା। କଂଗ୍ରେସ ପ୍ରାର୍ଥୀଙ୍କୁ ଏମଏଲସି ଭାବରେ ଚୟନ କରିବା ପାଇଁ ଶିବସେନା ବିଧାୟକଙ୍କ ଭୋଟ୍ ବ୍ୟବହାର କରିବା ବିରୋଧରେ ଏକନାଥ ସିନ୍ଦେ ଥିଲେ । ଆଲୋଚନା ଉଭୟ ପକ୍ଷ ମଧ୍ୟରେ ତୀବ୍ର ଯୁକ୍ତିରେ ପରିଣତ ହୋଇଥିଲା । ବର୍ତ୍ତମାନ ପଛକୁ ଚାହିଁଲେ ଏହା ବିଦ୍ରୋହର ଏକ ମୋଡ଼ ହୋଇପାରେ ବୋଲି ମନେହେଉଛି । ସେପଟେ ଶିବସେନା ଏବଂ ଶାସକ ଏମଭିଏର ନେତାଙ୍କ ମଧ୍ୟରେ ବଢ଼ୁଥିବା ବିବାଦକୁ ଦୃଷ୍ଟିରେ ରଖି ପୂର୍ବରୁ ହିଁ ଶରଦ ପାୱାର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଚେତାବନୀ ଦେଇଥିଲେ । ଏବଂ ଏକ ବିଦ୍ରୋହକୁ ମଧ୍ୟ ସୂଚାଇ ଦେଇଥିଲେ। ଏକ ସୂତ୍ରରୁ ପ୍ରକାଶ ଯେ, ଶରଦ ପାୱାର ଚାରିମାସ ପୂର୍ବରୁ ଉଦ୍ଧବ ଠାକରେଙ୍କୁ ଚେତାବନୀ ଦେଇଥିଲେ ଏବଂ ତାଙ୍କ ଦଳର ନେତା ତଥା ଅନ୍ୟ ଏମଭିଏ ମନ୍ତ୍ରୀମାନଙ୍କୁ ଭେଟିବା ପାଇଁ ପରାମର୍ଶ ଦେଇଥିଲେ।