(ସତ୍ଯପାଠ ବ୍ୟୁରୋ) ଭୁବନେଶ୍ବର : ପରଲୋକରେ ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେପିର ବରିଷ୍ଠ ନେତା କଲ୍ୟାଣ ସିଂହ । ମୃତ୍ୟୁ ବେଳକୁ ତାଙ୍କୁ ୮୯ ବର୍ଷ ବୟସ ହୋଇଥିଲା। ଦୀର୍ଘ ଦିନ ଧରି ଅସୁସ୍ଥ ହୋଇ ସେ ମେଡିକାଲରେ ଚିକିତ୍ସିତ ହେଉଥିଲେ। ତାଙ୍କୁ ସଞ୍ଜୟ ଗାନ୍ଧି ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସରେ ଲାଇଫ୍ ସପୋର୍ଟ ସିଷ୍ଟମ୍ରେ ରଖାଯାଇଥିଲା। ଜୁଲାଇ ୪ ତାରିଖରେ ତାଙ୍କର ସ୍ବାସ୍ଥ୍ୟରେ ଅବନତି ଘଟିବାରୁ ମେଡିକାଲରେ ଭର୍ତ୍ତି କରାଯାଇଥିଲା । ପରବର୍ତ୍ତୀ ସମୟରେ ସୁଧାର ଆସୁଥିବା ନେଇ ପ୍ରକାଶ କରିଥିଲେ ଚିକିତ୍ସା କରୁଥିବା ସ୍ୱତନ୍ତ୍ର ଡାକ୍ତରୀ ଦଳ । କିନ୍ତୁ ଆଜି ସଂନ୍ଧ୍ୟାରେ ଶେଷରେ ଆଖି ବୁଜିଛନ୍ତି କଲ୍ୟାଣ ସିଂହ।
କଲ୍ୟାଣ ସିଂହ ଉତ୍ତର ପ୍ରଦେଶର ଦୁଇଥର ମୁଖ୍ୟମନ୍ତ୍ରୀ ହେବା ସହ ରାଜସ୍ଥାନ ଏବଂ ହିମାଚଳ ପ୍ରଦେଶର ରାଜ୍ୟପାଳ ଭାବେ ମଧ୍ୟ କାର୍ଯ୍ୟ ତୁଲାଇଥିଲେ। ୧୯୯୧ ମସିହାରେ ପ୍ରଥମଥର ପାଇଁ ସେ ୟୁପିର ମୁଖ୍ୟମନ୍ତ୍ରୀ ହୋଇଥିଲେ। ତାଙ୍କ ମୁଖ୍ୟମନ୍ତ୍ରିତ୍ୱ କାଳରେ ୧୯୯୨ ମସିହାରେ ବାବ୍ରୀ ମସଜିଦ ଭଙ୍ଗା ଯାଇଥିଲା। ତାଙ୍କ ବିୟୋଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଠାରୁ ଆରମ୍ଭ କରି ବହୁ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରିଛନ୍ତି।
କଲ୍ୟାଣ ସିଂ ୧୯୬୭ ମସିହାରେ ଅତରଉଲି ବିଧାନସଭା ଆସନରୁ ଜିତି ରାଜ୍ୟ ରାଜନୀତିରେ ନିଜକୁ ପ୍ରତିଷ୍ଠିତ କରିଥିଲେ। ଏହା ପୂର୍ବରୁ 1962 ମସିହାରେ, 30 ବର୍ଷ ବୟସରେ କଲ୍ୟାଣ ସିଂ ଜନସଂଘ ଟିକେଟ୍ ରେ ଅତରଉଲି ବିଧାନସଭା ଆସନରୁ ଲଢି ହାରି ଯାଇଥିଲେ।
1962-67 ମଧ୍ୟରେ, ସେ କଠିନ ପରିଶ୍ରମ କରି ଥିଲେ । ଏହାର ଫଳାଫଳ ସ୍ବରୁପ 1967 ରୁ 1980 ପର୍ଯ୍ୟନ୍ତ କଲ୍ୟାଣ ସିଂ ବିଧାୟକ ଭାବରେ ଜିତିବାରେ ଲାଗିଲେ । 1989-90 ମସିହାରେ ମଣ୍ଡଳ ଆୟୋଗର ପୃଷ୍ଠଭୂମିରେ ଦେଶର ରାଜନୀତି ସରଗରମ ଥିଲା ଏବଂ ପରେ ବିଜେପି ଗଠନ ହେବାର 9-10 ବର୍ଷ ବିତିଗଲା। ମଣ୍ଡଳକୁ ଭାଙ୍ଗିବା ପାଇଁ ବିଜେପି କମଣ୍ଡଳ ରାଜନୀତି ଆରମ୍ଭ କରିଥିଲା ଏବଂ ‘ସଙ୍କଟମୋଚାନ୍’ କଲ୍ୟାଣ ସିଂ ଏହାର ନେତା ଭାବେ ଉଭା ହୋଇଥିଲେ।
ରାମ ମନ୍ଦିର ଆନ୍ଦୋଳନ ହିଁ ବିଜେପି ଏବଂ ଏହାର ବହୁ ନେତାଙ୍କୁ ଜାତୀୟ ସ୍ତରରେ ପ୍ରତିଷ୍ଠିତ ହେବାରେ ସାହାଯ୍ୟ କରିଥିଲା। ଉତ୍ତର ଭାରତରେ ଓବିସି ଭୋଟ୍ ରାଜନୈତିକ ସ୍ତରରେ ଦୃଢ ହେବାକୁ ଲାଗିଲା। ଆରମ୍ଭରୁ, ବାନିଆ ଏବଂ ବ୍ରାହ୍ମଣ ଦଳ ଭାବେ ପରିଚିତ ବିଜେପି କଲ୍ୟାଣ ସିଂଙ୍କ ଭଳି ଜଣେ ପଛୁଆ ଜାତିର ନେତାଙ୍କୁ ନିଜ ପଟକୁ ଆଣିବାକୁ ଚେଷ୍ଟା କରିଥିଲେ। ଅକ୍ଟୋବର 30, 1990 ରେ, ୟୁପି ବିଧାନସଭା ନିର୍ବାଚନ ପୂର୍ବରୁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ମୁଲାୟମ ସିଂ ଯାଦବ କର ସେବକ ଉପରେ ଗୁଳି ଚଳାଇଥିଲେ। ଏଭଳି ପରିସ୍ଥିତିରେ ବିଜେପି ନେତା କଲ୍ୟାଣ ସିଂ ରାମ ମନ୍ଦିର ଆନ୍ଦୋଳନକୁ ଆଗେଇ ନେଇଥିଲେ । କଲ୍ୟାଣ ସିଂ 5 ଜାନୁୟାରୀ 1932 ରେ ଉତ୍ତରପ୍ରଦେଶର ଆଲିଗଡ ଜିଲ୍ଲାର ଅତରଉଲି ତହସିଲର ମାଧୌଲି ଗ୍ରାମରେ ଜନ୍ମଗ୍ରହଣ କରିଥିଲେ। ଏକ କୃଷକ ପରିବାରରେ ଜନ୍ମ ହୋଇଥିବା କଲ୍ୟାଣ ସିଂଙ୍କ ପିତାଙ୍କ ନାମ ତେଜପାଲ ସିଂ ଲୋଦି ଏବଂ ମାତାଙ୍କ ନାମ ସୀତା ଦେବୀ ।
ସେ ଆଲିଗଡରୁ ତାଙ୍କର ପ୍ରାଥମିକ ଶିକ୍ଷା ସମାପ୍ତ କରିଥିଲେ ଏବଂ ଆଲିଗଡର ସ୍ଥାନୀୟ କଲେଜ୍ ଡିଏସ୍ ଡିଗ୍ରୀ କଲେଜରୁ ବିଏ ଶେଷ କରିଥିଲେ। ପରେ ସେ ମଧ୍ୟ ଶିକ୍ଷକ ଭାବରେ ଚାକିରି କରିଥିଲେ। କଲ୍ୟାଣ ସିଂ ରାମବତୀ ଦେବୀଙ୍କୁ ବିବାହ କରିଥିଲେ। ତାଙ୍କ ପୁଅର ନାମ ରାଜଭୀର ସିଂ ଡାକ ନାମ ରାଜୁ ଭୟା ଏବଂ ଝିଅଙ୍କ ନାମ ପ୍ରଭା ବର୍ମା।
