(ସତ୍ୟପାଠ ବ୍ୟୁରୋ) ଭୁବନେଶ୍ୱର : ପଶ୍ଚିମଵଙ୍ଗ ଏବଂ ତାମିଲନାଡୁ ବିଧାନସଭା ନିର୍ବାଚନରେ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କ ସଫଳତା ପରେ ଏବେ ଜାତୀୟ ରାଜନୀତିରେ ହଲଚଲ ଦେଖିବାକୁ ମିଳିଛି। ଏନସିପି ସୁପ୍ରିମୋ ଶରଦ ପାୱାରଙ୍କ ସହ ପିକେଙ୍କ ଘନ ଘନ ବୈଠକ ଏବଂ ଯଶୋବନ୍ତ ସିହ୍ନାଙ୍କ ରାଷ୍ଟ୍ରୀୟ ମଞ୍ଚ ଅଧୀନରେ ବିରୋଧୀଙ୍କ ବୈଠକକୁ ନେଇ ଏବେ ରାଜନୀତି ସରଗରମ ହୋଇଛି। ଏହା ମଧ୍ୟରେ ଜେଡିୟୁ ରାଷ୍ଟ୍ରୀୟ ସଭାପତି ରାମଚନ୍ଦ୍ର ପ୍ରସାଦ ସିଂ (ଆରସିପି ସିଂ) ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କୁ ଟାର୍ଗେଟ କରିଛନ୍ତି। ଆରସିପି କହିଛନ୍ତି ଯେ ପ୍ରଶାନ୍ତ କିଶୋର ଅନେକ ଲୋକଙ୍କୁ ପ୍ରଧାନମନ୍ତ୍ରୀ ହେବାର ସ୍ୱପ୍ନ ଦେଖାଉଛନ୍ତି। ସେ ଯୁଆଡେ ଯାଆନ୍ତି, ସେହି ସ୍ଥାନର ନେତାଙ୍କୁ ପ୍ରଧାନମନ୍ତ୍ରୀଙ୍କ ଚେୟାର ଦେଖାଯାଏ ଏବଂ ସେଠାରେ ପହଞ୍ଚାଇବାର ସ୍ବପ୍ନ ଦେଖାଇଥାନ୍ତି। ନିକଟରେ ଶେଷ ହୋଇଥିବା ପଶ୍ଚିମବଙ୍ଗ ଓ ତାମିଲନାଡୁ ବିଧାନସଭା ନିର୍ବାଚନରେ କୌଣସି ବ୍ୟକ୍ତି ନୁହେଁ ବରଂ ଲୋକମାନେ ସେଠାକାର ସରକାରଙ୍କୁ ଜିତାଇଛନ୍ତି ବୋଲି ଜେଡିୟୁ ରାଷ୍ଟ୍ରୀୟ ଅଧ୍ୟକ୍ଷ କହିଛନ୍ତି । ବିହାରରେ, ଜନତା ହିଁ ଜେଡିୟୁକୁ ଜିତାଇଛନ୍ତି। ଆରସିପି ସିଂ କହିଛନ୍ତି ଯେ ପ୍ରଶାନ୍ତ କିଶୋର ନ୍ୟୁଜ୍ ରେ ରହିବା ପାଇଁ ହେଡାଲାଇନ୍ ଛାଡନ୍ତି। ନିର୍ବାଚନ କୌଣସି ବ୍ୟକ୍ତିଙ୍କ ଦ୍ୱାରା ନୁହେଁ ବରଂ ଲୋକମାନଙ୍କ ଦ୍ୱାରା ଜିତାଯାଏ ବୋଲି ସେ କହିଛନ୍ତି। ପିକେଙ୍କୁ ଟାର୍ଗେଟ କରି ସେ କହିଛନ୍ତି ଯେ ଗଣତନ୍ତ୍ର କୌଣସି କମ୍ପାନୀ ଚଳାଇବା ଭଳି ନୁହେଁ। ଏହାସହ ବିହାରରେ ପିକେଙ୍କର କୌଣସି ସ୍ଥାନ ନାହିଁ ବୋଲି ସେ କହିଛନ୍ତି। ଆସନ୍ତା ବର୍ଷ ହେବାକୁ ଥିବା ୟୁପି ନିର୍ବାଚନରେ ଜେଡିୟୁ ପ୍ରତିଦ୍ୱନ୍ଦ୍ୱିତା କରିବ ବୋଲି ସେ ସ୍ପଷ୍ଟ କରିଛନ୍ତି । ଦଳ ପ୍ରଥମେ ଏହାର ଶକ୍ତି ଆକଳନ କରିବ ଏବଂ ତା’ପରେ ଗଠବନ୍ଧନ ଉପରେ ଆଲୋଚନା ହେବ ବୋଲି ସେ କହିଛନ୍ତି । ଜେଡିୟୁ ଏନଡିଏର ଏକ ଅଂଶ ଏବଂ ଦିଲ୍ଲୀ ବିଧାନସଭା ନିର୍ବାଚନରେ ଏନଡିଏର ସହଯୋଗୀ ଭାବରେ ଆମେ ଦୁଇଟି ଆସନରେ ପ୍ରତିଦ୍ୱନ୍ଦ୍ୱିତା କରିଥିଲୁ ବୋଲି ଆରସିପି ସିଂ ଗଣମାଧ୍ୟମକୁ ସୂଚନା ଦେଇଛନ୍ତି । ସୂଚନାଯୋଗ୍ୟ ଯେ ବିଜେପି ବିରୋଧରେ ତୃତୀୟ ଫ୍ରଣ୍ଟ ଗଠନ ନେଇ ଚାଲିଥିବା କଳ୍ପନା ଜଳ୍ପନା ମଧ୍ୟରେ ପ୍ରଶାନ୍ତ କିଶୋର ସ୍ପଷ୍ଟ କରିଛନ୍ତି ଯେ ଆଗାମୀ ଲୋକସଭା ନିର୍ବାଚନରେ ତୃତୀୟ କିମ୍ବା ଚତୁର୍ଥ ସାମ୍ମୁଖ୍ୟ ବିଜେପିକୁ ପରାସ୍ତ କରିବାର କୌଣସି ସମ୍ଭାବନା ନାହିଁ ।
