ଭୁବନେଶ୍ୱର (ସତ୍ୟପାଠ ବ୍ୟୁରୋ): ଆଜି ହେଉଛି ରାଜସ୍ଥାନ ବିଧାନସଭା ନିର୍ବାଚନ । ରାଜସ୍ଥାନରେ ୨୦୦ରୁ ୧୯୯ ବିଧାନସଭା କ୍ଷେତ୍ରରେ ମତଦାନ ଜାରି ରହିଛି । ମତଦାନ ସକାଳ ୭ଟାରୁ ଆରମ୍ଭ ହୋଇ ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିବ । ଡିସେମ୍ବର ୩ ତାରିଖରେ ଭୋଟ୍ ଗଣନା କରାଯିବ । ରାଜ୍ୟର ପ୍ରାୟ ୫.୨୫ କୋଟି ଭୋଟର ୧୮୬୨ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ।ଏଥିମଧ୍ୟରେ ୧୮ରୁ ୩୦ ବର୍ଷ ବୟସର ୧.୭୦ କୋଟି ଭୋଟର ଅନ୍ତର୍ଭୁକ୍ତ ରହିଛନ୍ତି ।
ରାଜ୍ୟରେ ୫୧,୭୫୬ଟି ପୋଲିଂ ବୁଥ୍ ସ୍ଥାପନ କରାଯାଇଛି । ଗୋଟିଏ ପର୍ଯ୍ୟାୟରେ ନିର୍ବାଚନ ହେଉଥିବାରୁ ସବୁଠି ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । କଂଗ୍ରେସ ଓ ବିଜେପି ମଧ୍ୟରେ ସିଧାସଳଖ ଲଢେଇ ଚାଲିଛି । ତେବେ ବର୍ତ୍ତମାନ କଂଗ୍ରେସର ୧୦୭ ବିଧାୟକ ଥିବାବେଳେ ବିଜେପିର ୭୦ ବିଧାୟକ ଅଛନ୍ତି। ଉଦୟପୁର ଏବଂ କରନପୁର ଆସନ ଖାଲି ପଡ଼ିଛି।
ବର୍ତ୍ତମାନ କଂଗ୍ରେସ କ୍ଷମତାରେ ଅଛି । ଦଳରେ ପାଇଲଟ-ଗେହଲଟ ବିବାଦ ଥିଲେ ମଧ୍ୟ ଉଭୟ ନେତା, ଜୋରଦାର ପ୍ରଚାର କରିଥିଲେ। ଏସବୁ ମଧ୍ୟରେ ଜନତା ଆଜି କାହାକୁ ବାଛିବେ , ତା ଉପରେ ସମସ୍ତଙ୍କ ନଜର ରହିଛି । ସେପଟେ ପ୍ରଚାରର ଶେଷ ଦିନରେ ବିଜେପି ଓ କଂଗ୍ରେସର ବହୁ ବଡ ବଡ ନେତା ପ୍ରାର୍ଥୀଙ୍କ ନିମନ୍ତେ ପ୍ରଚାର କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆରଜି ଷ୍ଟାଡିୟମ୍ ଦେବଗଡରେ ନିର୍ବାଚନୀ ସଭାକୁ ସମ୍ବୋଧିତ କରିଥିଲେ । ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ମଧ୍ୟ ବିଭିନ୍ନ ରାଲି ଓ ଶୋଭାଯାତ୍ରାକୁ ସମ୍ବୋଧିତ କରିଥିଲେ ।
