ଭୁବନେଶ୍ୱର (ସତ୍ୟପାଠ ବ୍ୟୁରୋ): ହମାସର ଆତଙ୍କବାଦୀ ଆକ୍ରମଣ ଓ ଇସ୍ରାଏଲର ଯୁଦ୍ଧ ଘୋଷଣା ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହ ଫୋନ୍ ରେ କଥା ହୋଇଛନ୍ତି। ଏହି ଟେଲିଫୋନ ଆଲୋଚନା ବେଳେ ମୋଦୀ ଆତଙ୍କବାଦକୁ ନିନ୍ଦା କରିବା ସହ ଇସ୍ରାଏଲ ପଛରେ ଭାରତର ସମର୍ଥନକୁ ଦୋହରାଇଛନ୍ତି ।
ଏନେଇ ମୋଦୀ ସୋସିଆଲ ମିଡ଼ିଆ ଏକ୍ସରେ ପୋଷ୍ଟ କରି ଲେଖିଛନ୍ତି, “ପ୍ରଧାନମନ୍ତ୍ରୀ ନେତାନ୍ୟାହୁ ମୋତେ ଫୋନ୍ କରି ପରିସ୍ଥିତି ସମ୍ପର୍କରେ ଅବଗତ କରାଇଥିବାରୁ ତାଙ୍କୁ ଧନ୍ୟବାଦ ଜଣାଉଛି। ଏହି କଠିନ ସମୟରେ ଭାରତବାସୀ ଇସ୍ରାଏଲ ସହ ଦୃଢ଼ତାର ସହ ଠିଆ ହୋଇଛନ୍ତି। ସବୁ ପ୍ରକାର ଆତଙ୍କବାଦକୁ ଭାରତ ଦୃଢ଼ ନିନ୍ଦା କରୁଛି।”
ଏଠାରେ ଉଲ୍ଲେଖଯୋଗ୍ୟ ଯେ, ମୋଦୀ ଇସ୍ରାଏଲ ସମ୍ପର୍କରେ ଗତ ତିନି ଦିନ ମଧ୍ୟରେ ୨ ଥର ସାମାଜିକ ଗଣମାଧ୍ୟମରେ ପୋଷ୍ଟ କରିଥିଲେ ବି ସେଥିରେ ପାଲେଷ୍ଟାଇନ ଆନ୍ଦୋଳନ ସଂପର୍କରେ ଆଦୌ ଉଲ୍ଲେଖ କରିନାହାନ୍ତି । ଏହାକୁ ଭାରତୀୟ ବୈଦେଶିକ ନୀତିରେ ଏକ ବଡ଼ ପରିବର୍ତ୍ତନ ବୋଲି କୁହାଯାଉଛି । ଗତ ଶନିବାର ମଧ୍ୟ ଇସ୍ରାଏଲ ଉପରେ ପାଲେଷ୍ଟାଇନ ଆତଙ୍କବାଦୀ ସଂଗଠନ ହାମାସର ରକେଟ୍ ଆକ୍ରମଣକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆତଙ୍କବାଦୀ ଆକ୍ରମଣ ବୋଲି ବର୍ଣ୍ଣନା କରିଥିଲେ । ଇସ୍ରାଏଲରେ ଆତଙ୍କବାଦୀ ଆକ୍ରମଣ ଖବର ଶୁଣି ମୁଁ ସ୍ତବ୍ଧ। ମୃତକଙ୍କ ପରିବାର ବର୍ଗଙ୍କ ସହ ଆମର ସମବେଦନା ରହିଛି ବୋଲି ମୋଦୀ ଶନିବାର କହିଥିଲେ ।
