ଜାତିର ପିତା ମହାତ୍ମା ଗାନ୍ଧିଙ୍କ ବିରୋଧରେ ବିବାଦୀ ଟିପ୍ପଣୀ ଦେଇ ଶେଷରେ ଗିରଫ ହୋଇଛନ୍ତି ସନ୍ଥ କାଳିଚରଣ ମହାରାଜ । କାଳିଚରଣ ମହାରାଜଙ୍କ ନାଁରେ ରାୟପୁରର ୨ଟି ଥାନାରେ ମାମା ରୁଜୁ ହୋଇଥିବା ବେଳେ, ତାଙ୍କୁ ଖୁଜୁରାହୋରୁ ରାୟପୁର ପୋଲିସ ଗିରଫ କରିଛି । ତାଙ୍କୁ ଗିରଫ କରାଯାଇଥିବା ନେଇ ରାୟପୁର ଏଏସପି ଅଭିଷେକ ମାହେଶ୍ୱରୀ ସୂଚନା ଦେଇଛନ୍ତି ।
ଖୁଜରାହୋର ଏକ ହୋଟଲରେ ଥିଲେ କାଳିଚରଣ ମହାରାଜ । ବିଶେଷ ସୂତ୍ରରୁ ଖବର ପାଇ ଭୋର ସାଢ଼େ ୪ଟା ବେଳେ ତାଙ୍କୁ ଗିରଫ କରିଛି ରାୟପୁର ପୋଲିସ । ସେଠାରୁ ତାଙ୍କୁ ରାୟପୁର ଅଣାଯାଉଛି । ଆଜି ତାଙ୍କୁ କୋର୍ଟ ଚାଲାଣ କରାଯିବ । ମହାତ୍ମା ଗାନ୍ଧିଙ୍କ ବିରୋଧରେ ବିବାଦୀୟ ଟିପ୍ପଣୀ ପାଇଁ ରାୟପୁର ସମେତ ଦେଶର ବିଭିନ୍ନ ସ୍ଥାନରେ କାଳିଚରଣ ମହାରାଜଙ୍କ ନାଁରେ ମାମଲା ହୋଇଥିଲା ।
ସୂଚନାଯୋଗ୍ୟ, ଗତ ୨୫ ଓ ୨୬ ତାରିଖରେ ରାୟପୁରର ଏକ ଧର୍ମସଭାକୁ ସମ୍ବୋଧିକ କରିବା ବେଳେ ମହାତ୍ମା ଗାନ୍ଧୀଙ୍କ ବିଷୟରେ ଆପତ୍ତିଜନକ ମନ୍ତବ୍ୟ ଦେଇଥିଲେ କାଳିଚରଣ ମହାରାଜ । ଭାରତର ବିଭାଜନ ପାଇଁ ଜାତିର ପିତା ମହାତ୍ମା ଗାନ୍ଧୀଙ୍କୁ ଦାୟୀ କରିଥିଲେ । ବାପୁଜୀଙ୍କୁ ହତ୍ୟା କରିଥିବାରୁ ନାଥୁରାମ ଗଡସେଙ୍କୁ ଧନ୍ୟବାଦ ଦେଇଥିଲେ କାଳିଚରଣ ।
