ତାଳଚେର : ଆସନ୍ତା ୨୮ ତାରିଖରେ କେନ୍ଦ୍ର କୋଇଲା ମନ୍ତ୍ରୀ ପ୍ରହଲ୍ଲାଦ ଯୋଶୀ ତାଳଚେର କୋଲ୍ ଫିଲଡ୍ସ ଗସ୍ତରେ ଆସିବାର କାର୍ଯ୍ୟକ୍ରମ ରହିଛି । ସେଦିନ ପୂର୍ବାହ୍ନ ପ୍ରାୟ ୧୧ଟା ସମୟରେ ହେଲିକପ୍ଟର ଯୋଗେ ହିଙ୍ଗୁଳା ହେଲିପ୍ୟାଡ୍ଠାରେ ଅବତରଣ କରିବା ପରେ ତାଳଚେର କୋଲ୍ ଫିଲଡ୍ସ ଅନ୍ତର୍ଗତ କୋଇଲା ଖଣି ପରିଦର୍ଶନ କରିବେ । ସମସ୍ତ କୋଇଲା ସାଇଡିଂକୁ ଯାଇ କୋଇଲା ପରିବହନ ସମ୍ପର୍କରେ ଅନୁଧ୍ୟାନ କରିବେ ।
ସାରା ଭାରତ ବର୍ଷରେ କୋଇଲା ସଙ୍କଟ ଦେଖାଦେଇଥିବା ଖବର ପ୍ରସାରିତ ହେବା ପରେ ଏହାର ବାସ୍ତବତା ଅନୁଧ୍ୟାନ କରିବେ ମନ୍ତ୍ରୀ ଶ୍ରୀ ଯୋଶୀ । କୋଇଲା ଉତ୍ତୋଳନ, ପରିବହନ ଓ ଷ୍ଟକ୍ ସମ୍ପର୍କରେ ଉଚ୍ଚସ୍ତରୀୟ ପଦାଧିକାରୀଙ୍କ ସହ ସମୀକ୍ଷା କରିବାର କାର୍ଯ୍ୟକ୍ରମ ସ୍ଥିରୀକୃତ ହୋଇଥିବା ସୂଚନା ମିଳିଛି । ପରେ ମନ୍ତ୍ରୀ ଜଗନ୍ନାଥ ହେଲିପ୍ୟାଡ୍ଠାରୁ କଣିହାଁ କୋଇଲା ଖଣି ପରିଦର୍ଶନ କରିବେ ।
କେନ୍ଦ୍ର କୋଇଲା ମନ୍ତ୍ରୀ ଶ୍ରୀ ଯୋଶୀଙ୍କ ସହ କୋଇଲା ରାଷ୍ଟ୍ରମନ୍ତ୍ରୀ ରାଓସାହେବ ପାଟିଲ ଦାନଭେ ଆସୁଥିବା ଜଣାପଡ଼ିଛି । ମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ଏମ୍ସିଏଲ୍ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ପ୍ରଭାତ କୁମାର ସିହ୍ନାଙ୍କ ସମେତ ନିର୍ଦ୍ଦେଶକମଣ୍ଡଳୀ ତାଳଚେରରେ ପହଞ୍ଚିଛନ୍ତି । କୋଇଲା ମନ୍ତ୍ରୀଙ୍କ ଗସ୍ତ ପରିପ୍ରେକ୍ଷୀରେ ବିଭିନ୍ନ ରାସ୍ତାକାର୍ଯ୍ୟ ମରାମତି ସହ ସଫେଇ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି ।
