କୋରାପୁଟ : କୋରାପୁଟ ମସ୍ତିପୁଟ ଗାଁରେ ବ୍ୟାପିଲା ଝାଡ଼ାବାନ୍ତି ଆତଙ୍କ । ଅନେକ ଆକ୍ରାନ୍ତ ଚିହ୍ନଟ ହୋଇଛନ୍ତି । ମସ୍ତିପୁରରେ ୧୬ ଆକ୍ରାନ୍ତ ଚିହ୍ନଟ ଚିହ୍ନଟ ହୋଇଥିବା ବେଳେ ସେମାନଙ୍କ ମଧ୍ୟରୁ ୬ ଜଣ ଗୁରୁତରଙ୍କୁ କୋରାପୁଟ ସହିଦ୍ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସେମାନଙ୍କ ମଧ୍ୟରେ ଗୋଟିଏ ପରିବାରର ୪ ଜଣ ଆକ୍ରାନ୍ତ ଥିବା ଜଣାପଡ଼ିଛି। ଗାଁରେ ସ୍ଥିତି ଅନୁଧ୍ୟାନ ପାଇଁ ଗୋଷ୍ଠୀ ଉନ୍ନୟନ ଅଧିକାରୀଙ୍କ ସହିତ ଡାକ୍ତରୀ ଦଳ ପହଞ୍ଚିଛନ୍ତି।
ଦୂଷିତ ଜଳ ବ୍ୟବହାର ଯୋଗୁଁ ଝାଡ଼ାବାନ୍ତି ବ୍ୟାପୁଥିବା ଆଶଙ୍କା କରାଯାଉଛି। ଦୂଷିତ ଜଳର ନମୁନା ପରୀକ୍ଷଣ ପାଇଁ ପଠାଯାଇଛି। ରିପୋର୍ଟ ଆସିବା ପରେ ପ୍ରକୃତ କାରଣ ଜଣାପଡିବ ଡାକ୍ତରୀ ଟିମ୍ କହିଛନ୍ତି। ଅନ୍ୟପଟେ ଗୋଷ୍ଠୀ ଉନ୍ନୟନ ଅଧିକାରୀ ନରେନ୍ଦ୍ର ନାୟକ ଗାଁରେ ପହଞ୍ଚି ଆଶାକର୍ମୀ ଓ ଅଙ୍ଗନବାଡି କର୍ମୀଙ୍କ ସହ ଆଲୋଚନା କରିଛନ୍ତି। ସେ ଘରକୁ ଘର ବୁଲି ଲୋକଙ୍କ ସ୍ଵାସ୍ଥ୍ୟବସ୍ଥା ପଚାରି ବୁଝିବା ସହ ସଫେଇ କାର୍ଯ୍ୟ ତଦାରଖ କରିବା ଏବଂ ଗ୍ରାମବାସୀଙ୍କୁ ଦୁଷିତ ଜଳ ବ୍ୟବହାର ନକରିବାକୁ ସଚେତନ କରିଛନ୍ତି। ଗାଁରେ ଆସନ୍ତା ୨୪ଘଣ୍ଟା ପର୍ଯ୍ୟନ୍ତ ଅସ୍ଥାୟୀ ଚିକିତ୍ସା ଶିବିର କରିବା ସହିତ ଆଲର୍ଟ କରାଯାଇଛି ।
